Ракети и маски

МАКЕДОНИЈА - Министрите за надворешни работи на земјите од Западниот Балкан, на иницијатива на шефот на македонската дипломатија Никола Димитров, денеска испратија писмо до комесарот за трговија Фил Хоган, комесарот за соседство и проширување Оливер Вархеји и до високиот претставник на ЕУ и потпретседател на ЕК Жозеп Борел со барање за изземање на земјите од Западен Балкан од регулативата на ЕУ со која одредени медицински продукти за лична заштита беа ставени под режим на извозни рестрикции, односно специјални извозни дозволи, соопшти Министерството за надворешни работи.

МАКЕДОНИЈА - Министерството за здравство информира дека во изминатите 24 часа се регистрирани 46 нови случаи позитивни на коронавирусот. Со ова вкупната бројка на дијагностицирани пациенти со Ковид-19 во нашата земја изнесува 663 лица.

МАКЕДОНИЈА / АВСТРАЛИЈА - Македонско-австралиското 3-Block Studio го изработи Quarantine, краток анимиран филм за глобалниот карантин поради пандемијата.

АВСТРАЛИЈА - Австралиските власти денеска се заканија со големи парични казни, па дури и затворски за оние кои без посебна причина ќе го напуштат домот за време на Велигденските празници, со цел да се намали ширењето на коронавирусот.

АВГАНИСТАН - Пет ракети утрово погодија американска база во Авганистан, соопштија двајца претставници на американските сили. Во нападот, за кој одговорноста ја презеде терористичката Исламска држава, нема жртви.

БЕЛГИЈА - На 15 март Северноатлантскиот Совет ќе одржи вонреден состанок на ниво на министри за одбрана, на кој тема за дискусија ќе биде одговор на Алијансата против проширувањето на вирусот Ковид-19, соопшти Алијансата. Како што се наведува на интернет страната на НАТО, состанокот ќе се одржи како телеконференција, а со него ќе претседава првиот човек на Алијансата, Јенс Столтенберг.

ФРАНЦИЈА - Францускиот претседател Емануел Макрон го поддржа генералниот директор на СЗО, Тедрос Адханом Гебрејезус, при што наведе дека одбива да ја види таа организација притисната меѓу Кина и САД.

ЈЕМЕН - Меѓународната коалиција предводена од Саудиска Арабија која се бори против шиитското востание во Јемен, денеска го прекинува огнот, соопштија саудиските власти, додавајќи дека одлуката е одговор на повиците на Обединетите нации да се стави крај на судирите за време на пандемијата на коронавирусот.

ВЕЛИКА БРИТАНИЈА - Британскиот премиер Борис Џонсон останува во стабилна и подобрена состојба во интензивната нега, изјави министерот за култура Оливер Дауден за Би Би Си.

СРБИЈА - Синот на српскиот претседател Александар Вучиќ, Данило Вучиќ, е заразен со коронавирус и заради клиничката слика е хоспитализиран на Инфективната клиника во Белград. Веста ја објави самиот претседател на својот инстаграм профил.