Воведот во концертните мајски случувања за љубителите на класичната музика е повеќе од благопријатен. Дури, ќе си земам за право да кажам „светски“. Онака како што прилега на средина која го почитува сопственото музичко творештво и која остава широк простор за воспоставување на пожелуваните музички врски. И, само така и никако поинаку може да се најави она што не очекува утревечер, во среда на 4 мај во 20 часот, во Камерната сала на Филхармонија. Во определениот термин е закажан концертот на француско-македонското дуо СолиПс, кое патем го сочинуваат флејтистката Елена Стојческа и гитаристот Ромен Петио, и нашата оперска певица - сопранистката Гонца Богоморова-Краповска. Тие заедно потпишуваат исклучително модерна музичка програма која е обоена со оригинална уметничка инспирација. Концертот, како што ќе биде забележано, најнапред е „сцена“ за светската праизведба на оригиналното дело „Океан во капка“ на македонската композиторка Дарија Андовска.
„Океан во капка“ е специјално напишана за дуото СолиПс и за сопранистката Гонца Богоморова-Краповска. Кога мислев каква композиција да им напишам по нарачка прво ми текна на севкупната боја на нивниот ансамбл и тоа ме повлече да мислам на Руми и на еден негов цитат којшто јас го парафразирав – во оригинал е „Ти не си капка во океан, туку си океан во капка!“, а јас го парафразирав во „Јас не сум капка во океан, туку океан во капка!“ . Начинот на којшто тие го изведуваат делото, заедно со фиксен медиум, мислам дека е единствен. Една од најдобрите изведби коишто јас сум ги чула на мое дело во мојот живот. А на Стојчевска и Петио ова им е првата соработка со Богоморова – Краповска и неверојатно е нивото на професионалност кое го имаат постигнато во нивниот век за вака после три проби композициите да се доведени до ниво на совршенство, вели композиторката.
Дарија Андовска
Интересно е и тоа што на концертот по прв пат на некоја од нашите сцени ќе бидат изведени и две македонски традиционални песни - „Си заљубив едно моме“ и „Со маки сум се родила“ , преработени повторно од Андовска за овој ансамбл.
Овие две песни се дел од циклусот „Песни од татковината“ којшто е оригинално напишан за македонскиот бас-баритон Милан Силјанов и кој тој го изведуваше во Баварската државна опера во Минхен. Сега тие песни се преработка за гитара, флејта и сопран и за оваа програма. Се разбира секоја преработка си повлекува и нови композициски интервенции. Мојот приод кон македонскиот фолклор чекаше јас да созреам за да си дозволам да му пристапам затоа што се плашев да не го сквернавам и се држам до тоа она што е изворна македонска музика да биде како клесано во камен, додека мојот придонес е како филигранска обработка околу тоа што е трајно забележано на каменот, смета Дарија Андовска.
Родена 1979 година Андовска е композиторка на оркестарска, камерна, солистичка, вокална музика, музика за филм, театар и танц, како и на мултимедијални проекти. Нејзините дела се изведувани на бројни домашни и светски фестивали, почнувајќи од Македонија, Бугарија, Србија, Црна Гора, Босна и Херцеговина, Хрватска, Словенија, Швајцарија, Италија, Германија, Грузија, Франција, Белгија, Англија, Ирска, Данска, Шведска, Норвешка, Украина, Азербејџан, Австрија, Албанија, Русија, Мексико, Канада, Полска, Романија, Ерменија, Турција, САД... а наградувана е и издвоена како еден од најзначајните музички творци од помладата генерација во Европа.
Програмата на овој несекојдневен концерт ја чинат и три дела на француски автори кои ќе ја доживеат македонската премиера - „Две поеми од Ронсар“ на Албер Русел, извонредното „Самогласки за соло флејта“ на Софи Лаказ инспирирано од поема на Артур Рембо и „Мирот почива во пустина“ на Жан-Кристоф Роза. Покрај нив тука се и популарната „Арија на Бахијана Бразилерас n°5“ на бразилскиот класик Хектор Вила-Лобос која овојпат ќе биде изведена во нејзината оригинална верзија за вокал и гитара и за крај композицијата „Сон во сон“ од италијанскиот композитор Масимилијано Месиери, кој ќе биде гостин на овој концерт.
А кога сме веќе кај Месиери, чисто информативно дека е роден 1964 година во Болоња, а неговите дела се изведувани низ Европа и САД. Како што пишува италијанската критика „кај Масимилијано Месиери можете да слушнете извонреден баланс помеѓу стилски карактеристики на популарна музика од медитеранскиот регион и современата музичка техника“.
Елена Стојческа и Ромен Петио - дуо СолиПс
Од друга страна, зад дуото СолиПс со својот изведувачки габарит стојат македонската флејтистката Елена Стојческа и францускиот гитарист Роман Петио. Тие својата звучна авантура ја почнале во 2011 година и досега одраже бројни концерти и настапи на фестивали во Франција, Италија, Чешка, Сан Марино, Русија, Белгија, Босна и други земја. Негуваат репертоар во кој се дела од 20 и 21ви век, а тесно соработуваат и со мнозина современи европски композитори ( Доина Ротару, Месиери, Тору Такемицу, Винсент Еро, Лоранс Шер или Едисон Денисов) премиерно изведувајќи дела специјално напишани и посветени на дуото .
Гонца Богоромова Краповски
Конечно, Гонца Богоромова Краповски е уметник која своите достигнувања ги афирмира преку забележителна концертна дејност на домашната и меѓународната сцена. Како солист и камерен музичар соработувала со еминентни домашни и странски ансамбли, диригенти, солисти и пијанисти. Работи како наставник по соло пеење и камерна музика при ДМБУЦ „Илија Николовски – Луј“ во Скопје.
Инаку, зад овој концерт како организатори стојат Францускиот институт од Скопје и Министерството за култура, а влезот за посетители е слободен.