Владата најави приватизација на Поштата. Некои коментираат на социјалните мрежи дека со тоа ќе се добијат подобри услуги оти сега преку Пошта во октомври може само да ти стигне новогодишна честитка од покојната баба. Други, пак, велат дека Поштата е намерно уништена со вработувањето партиски кадри.
Владата најави приватизација на Поштата, која со години трупа загуби. Ќе се прави физибилити студија дали Поштата да се понуди за јавно-приватно партнерство или да се оди на целосна приватизација. Според податоците на Министерството за финансии, само годинава Поштата направила долг од скоро 1 милион евра, а Државниот завод за ревизија утврдил дека досега се натрупани долгови од 10 милиони евра.
На социјалните мрежи едни велат дека Поштата се претворила во дувло за партиски вработувања и не може да се носи на отворениот пазар, а според препораките на ЕУ мора да продолжи процесот за целосна либерализација на поштенските услуги. Во овој момент преку Пошта може да ти стигне само честитка за Нова година од покојната баба, велат дел од граѓаните.
Државната Пошта има монопол врз доставата на пратки до 50 грама, но и покрај тоа бележи загуби. Останатите фирми што се занимаваат со поштенски услуги пренесуваат само поголеми пратки. Ако не се приватизира денес, само ќе продолжи да трупа загуби и за 10 години нема да вреди пет пари.
Ако се приватизира ќе можеме како нормалните во светот да праќаме и примаме пошта, а не дувло за крадење на дуи. 70 пратки ми се украдени во 2019, 17 пратки во 2020 ми се украдени од вкупно 32 порачани. Катастрофа! pic.twitter.com/RYUfAm4c5h
— Џедај до гроп од ex ФИРОМ (@kjosmofon) October 14, 2020
Со @Martynni сѐ уште си ги чекаме разгледниците пратени за Божиќ 2020!!!! Мислам дека полопа комбинација од ит/мк пошта нема
— tribanana (@chokoleshnik) October 15, 2020
Пошта ја продаваат затоа што е дувло, пропадната, криминогена, непрофесионална и што е најважно генерира загуби секоја година се повеќе и повеќе, а тоа го плаќаме ние! Сеа појасно е зошто?
— Др Арсланагић (@ArslaJeMeniBog) October 14, 2020
Ако тоа се аргументите за приватизација, тогаш треба да ја ставиме и државата на продажба, се шегуваат некои.
Македонија е дувло, пропадната, криминогена, непрофесионална и што е најважно генерира загуби секоја година се повеќе и повеќе, а тоа го плаќаме ние! Да ја продадеме 🙄
— The Professional (@Jovanovski_mk) October 15, 2020
Пошта да се приватизира. Мене ако ме прашате, јас би ги приватизирал и сите министерства.
— Патлак илити пиштол (@posleDIKnaPIK) October 15, 2020
Други, пак, ја нарекуваат Поштата „миленичето на ДУИ“ и потсетуваат дека директори од оваа партија ја водат Поштата веќе 16 години. За тоа време се случија низа нерасветлени грабежи на поштенски транспорт на пари, а во 2013 година изби пожар кој пеплоса дел од главната зграда на Поштата која е на стотина метри од владата. Нивната работата ја следеа и многу неправилности - од крадење пари од страна на вработените, до грешни поштенски марки кои предизвикуваа меѓународни скандали.
Во досегашните ревизорски извештаи се констатирани низа пропусти во работењето - се давале аванси за службени патувања без покритие, на раководни позиции се поставувале луѓе без соодветно образование, а и покрај загубите директорите си се наградувале со високи бонуси. Во Поштата работат скоро 2200 луѓе.
Пошта е пропадната веќе 10+ години, вработуваше пропаднати партиски и фамилијарни кадри. Мислите дека со истиот метод ружи ќе цветаат по агенциите/министерствата?
— Chlamydia (@Schiffer_PG14) October 15, 2020
Пошта требаше да се приватизира пред 10-15 години . Имаше преговори ,Канаѓаните беа заинтересирани скенираа внатре .... и нашиве се повлекоа. Во меѓувреме напикаа плакетолепачи и дунстери а најмалку поштари .
— Шинџи (@Kobayashee) October 15, 2020
Политика е да ја цицаш Пошта 20 години и на крај да ја приватизираш и од тоа ќар да имаш и да не си никако крив.
— Бавчов (@Bavcov) October 15, 2020
Ако Пошта тоне тоа е затоа што некој така сакал, и доста трубите. Не може сервис од кој е зависен секој граѓанин и фирма туку-така да отиде во аут. Долгорочна стратегија е тоа.Најмалку што може власта е да забрани било каква пренамена на имотот за друга дејност, засекогаш!
— Bob der Baumeister 🇩🇪❤🇲🇰 (@dolnacrta) October 14, 2020
Они држава шитнаа, за ситнава боранија ко пошта и железници око нема да им трепне.
— biti (@rekolamaaj) October 14, 2020
Ние проголтавме здравство и образование да ги приватизираат, па за една пошта.
— Џастис (@ca45se15) October 15, 2020
Маливе карго и курирски фирми ршум направија низ државава благодарение на недоверливоста и неспособноста на македонска пошта
— Грегорич Пек (@marsedonec) October 15, 2020
Најавите за приватизација на Поштата некои ги потсети на приватизацијата од 90-тите, кога илјадници луѓе останаа без работа.
Премиерот Зоран Заев најави дека освен „Македонскa поштa“, можно е приватизирање и на Еурокомпозит, ТЕЦ Неготино, Македонски железници - Транспорт, но и други претпријатија.
Ова ќе биде втор обид за приватизација на „Македонски пошти“. Во 2009 година имаше преговори со Канадски пошти, кои сакаа да ја преземат македонската Пошта. Владата и Канаѓаните преговараа две години, но од тоа не испадна ништо. Канадски пошти ја побараа македонската пошта за без пари во наредните 20 години, а за возврат понудија инвестиции од 40 милиони евра, со ветување дека Македонска пошта ќе биде регионален центар и профитабилна фирма.