Додека големите партии постепено ги објавуваат кандидатите за претстојните локални избори планирани за наесен, и граѓански активисти најавуваат дека ќе кандидираат свои кандидати за советници во општинските совети.
Зелен хуман град, иницијатива зад која стојат 12 организации повикува граѓаните да се кандидираат на првата независна листа за членови на Советот на Град Скопје за претстојните избори.
Во Тетово група граѓански активисти ќе се кандидираат за независни советници, собрани во иницијатива „Подобро за Тетово“.
Претходно во Охрид беше формиран Иницијативен одбор за поднесување листа на независни кандидати за членови на Советот на Општината, под мотото „Охрид пред сè“.
На локалните избори во регионот се случуваше „мала револуција“ кога големите партии изгубија на пример во поголемите градови на изборите во Босна. За градоначалник на Загреб, хрватските гласачи избраа млад левичар активен во еколошки акции и иницијативи, а големите партии изгубија и во Сплит.
Видете и ова: Предвреме отворена сезоната на лов на гласовиМожни ли се промени?
Не е невозможно независни листи на кандидати да освојат членови на општинскии совети, но зависи и од структурата на луѓето што ќе стојат зад тие листи, вели политичкиот аналитичар Алберт Муслиу. Но, како што вели, ова е демократско општество, па што поголема конкуренција, толку и подобар квалитет на кадри ќе има.
„Ова се локални избори и бројот на гласови да се влезе во советници е многу помал отколку бројот на гласови на пример за парламентарни избори за независни пратеници. Не гледам ништо лошо, во секој случај би го разбиле монополот кој го имаат политичките партии и можеби тоа позитивно ќе влијае и врз структурата на кандидатите која ќе ја понудат политичките партии“, вели Муслиу.
Тој додава дека сепак независните листи на кандидати немаат претпоставен број на гласачи како што имаат политичките партии.
„Тоа би требало да биде и целта на независните листи да ги натераат граѓаните да размислат дали ќе го дадат гласот за претставници на политичките партии или за листата на независни кои би требало да понудат квалитет што ќе ги привлече гласачите“, вели Муслиу.
Граѓаните не ги знаат имињата на советниците
Неодамнешното истражување на Меѓународниот републикански институт ИРИ покажа дека во некои општини една третина од испитаниците не го знаат името на својот градоначалник, а во ниту една општина вклучена во истражувањето граѓаните не знаеле да набројат имиња на барем пет советници од општинскиот совет.
Но, во истата анкета, граѓаните кои одговориле дека не се задоволни од работата на својот градоначалник, сепак одговориле дека повторно би гласале за партијата што ги предложила.
Политичарот со долгогодишно искуство Тито Петковски вели дека случувањата во регионот може да повлијаат и во Македонија.
„Во Хрватска имавте луѓе кои не беа партиски определени, можеби беа поддржани од некои партии, но излегоа со свои програми, победија во Загреб. Многу добар пример е онаа жена што победи во Сараево, па во Тузла во БиХ, веќе ги надминаа тие етнички рамки и партиски строги рамки кои утврдиле дека својот кандидат треба да биде апсолутно припадник на таа политичка партија. Мислам дека постепено и кај нас ќе доаѓаат способни и креативни луѓе кои може да направат програма и кои навистина сакаат да му помогнат на граѓанинот во местото на живеење, а не само да дојде до место советник за да може да влијае или градоначалник па да извршува партиска наместо граѓанска програма“, вели Петковски.
Партиските функционери се растрчаа низ Македонија во изборна година
Премиерот Зоран Заев најави дека локалните избори може ќе се одржат на 31 октомври, но претседателот на Собранието се уште не ги распишал изборите. Се очекува изборите да бидат распишани до крајот на месецов или најдоцна на почетокот на август.
Ова ќе бидат седми по ред локални избори од осамостојувањето на Македонија.
Досега на локалните избори имало независни кандидатски листи кои успеале да освојат советнички места. Независните кандидати за градоначалник, обично истакнати личности во општеството, спортисти, уметници, професори, пак немале поголем успех.