Минимално ќе поскапе струјата за првиот и за вториот блок на домаќинствата, односно за повеќе од 90 проценти од граѓаните, покажуваат пресметките на Радио Слободна Европа, откако Регулаторната комисија за енергетика ги објави новите цени на електричната енергија од 1 јануари.
Малите потрошувачи како фризерници, мали кафулиња и продавници од Нова година ќе добијат сметки пониски за 20 отсто, соопшти денеска претседателот на Регулаторната комисија за енергетика (РКЕ) Марко Бислимоски.
Регулаторна, која ги пресметува цените на струјата без да вклучи ДДВ, всушност ги намали цените за првиот и за вториот блок за домаќинства, меѓутоа од 1 јануари почнува да важи мерката за враќање на ДДВ-то од 5 на 10 проценти, па сметките ќе бидат речиси исти како и досега.
„Ќе се сконцентрираме за да им помогнеме на малите потрошувачи коишто се на регулираниот пазар. Вкупната цена за електрична енергија на малите потрошувачи, во кои се вкалкулирани и енергијата и мрежарината, од 1 јануари се намалува за 20,15 проценти. Оваа цена ќе се применува за 70 илјади компании во државата, коишто во минатиов период се соочуваа со зголемени трошоци за електрична енергија“, рече Бислимоски.
Видете и ова: Владата почна да се фали на сметките за струјаСо новата одлука на РКЕ, кај домаќинствата кои повеќе штедат ќе се намали цената на електрична енергија. За првиот блок цената на струјата ќе се намали за 4,11 проценти, а за вториот блок ќе има намалување од 2,95 проценти.
Од друга страна, оние кои трошат повеќе ќе добијат зголемена цена. Така, цената на третиот блок се зголемува за 0,85 проценти, додека за четвртиот ќе има зголемување за 7,65 проценти.
„99,2 проценти од домаќинствата во држава ќе имаат намалени цени на електрична енергија. Доколку продолжат домаќинствата да штедат, многу мал процент ќе имаат зголемени трошоци за електрична енергија. Тоа се конкретни мерки коишто ќе помогнат на граѓаните за да им се подобри нивниот животен стандард“, рече Бислимовски.
На пример ако семејство троши 630 киловатчаса скапа струја, сметката од Нова година ќе му биде повисока за 1,2 проценти. Или ако сметката досега ви била 3000 денари, од 1 јануари ќе ви биде за 35 денари повисока.
Поголемо поскапување ќе има за оние кои трошат повеќе струја, односно за потрошувачите од трет и четврт блок.
Инфографика - Приказ на цената на струјата за домаќинствата по блокови
Според одлуките на регулаторите, цената на струјата се зголемува, но поевтинува надоместот за пренос и дистрибуција, па затоа во конечната цена има мали промени.
„Она што е исто така многу битно, во изминатиот период имаше реакции дека трошокот за мрежарина е поголем од трошокот за енергија. Сега тоа ќе се промени поради тоа што трошокот за дистрибуција на електрична енергија, за категоријата каде што се прикучени домаќинствата, се намалува за 20,6 проценти“, рече Бислимовски.
Државниот производител ЕСМ за првата половина од наредната година понуди струја по 56 евра за мегаватчас, наместо досегашните 48 евра. Оваа цена не зависи од Регулаторната комисија за енергетика, туку ја одредуваат ЕСМ и Владата.
За да го ублажи ценовниот удар од поскапувањето на струјата, владата уште на средината на 2021 година го намали ДДВ од 18 на 5 отсто. Од 1 јули годинава требаше да се покачи на 10 отсто, но владата го продолжи важењето до Нова година. Планот е во текот на наредната година ДДВ да се врати на претходната стапка од 18 проценти.
Вашиот пребарувач не подржува HTML5
Бислимоски - Се противам на поскапување на струјата од Нова година
Претседателот на РКЕ информира дека за домаќинствата останува иста блоковската структура и границите, додека воведувањето на блокови за малите потрошувачи се одлага до 30 јуни идната година.
На почетокот на 2021 година струјата поскапе за 10 отсто, а летоска уште еднаш за во просек 7,4 отсто. Од 1 август беа воведени таканаречени блок тарифи за скапа струја, па така тие што трошат повеќе плаќаат поскапа струја. Евтината струја има иста цена независно од потрошувачката.
Беа воведени 4 блока – најевтино се плаќаат првите 210 киловатчаса скапа струја, малку поскапо потрошувачката меѓу 210 и 630 киловачаса, уште поскапо од 630 до 1050 киловатчаса месечно, а секој киловатчас над оваа граница потрошен во скапа тарифа е значително поскап.