Зошто доларот го надмина еврото?

Американскиот долар - кој сочинува 60 проценти од светските девизни резерви - се смета за безбедно засолниште во време на геополитички турбуленции и нарушувања, кои започнаа со пандемијата на коронавирусот, а се влошија со избувнувањето на војната во Украина.

Некои аналитичари предвидуваат дека еврото би можело да падне на 90 американски центи доколку Русија ја ескалира кризата со прекинување на дополнителните испораки на гас за Европа, пишува „Блумберг“. Од почетокот на јули, трговците со опции се обложуваат на 0,95 долари за едно евро.

Јелен: Се очекува забавување на американската економија

Пробивањето на границата од 1:1 е психолошки праг за пазарот. За прв пат еврото беше послабо од доларот во декември 1999 година, ниту една година по неговото создавање.

Како и сега, аналитичарите укажуваа на зголемениот распон помеѓу приносите на германските и американските обврзници и посилен раст во САД. Тоа беше еден вид удар за гордоста на Европејците, кои ја гледаа заедничката валута како важен политички проект и ривал на доминантниот долар.

Денес, еврото се смета за една од клучните светски трансакции и резервни валути, иако постигнувањето паритет останува симболично. Трговците со валути очекуваат турбуленции околу нивото 1:1, бидејќи милијарди евра и долари инвестиции се врзани за таа голема линија во песокот.

Без оглед на курсот на доларот и дали рецесија е неизбежна, инвеститорите најверојатно ќе треба да се подготват за многу понестабилни пазари отколку што беа навикнати во изминатите 40 години, велат некои економисти.

Со децении, ерата на големата умереност ги мазнеше промените во економскиот раст и инфлацијата и ги наградуваше инвеститорите кои купуваа хартии од вредност и други средства секогаш кога цените паѓаа, наведува агенцијата АП.

Сега, со ограничувањата на производството што ја поттикнуваат инфлацијата, високите нивоа на долгови кои ги оптоваруваат економиите и „хиперполитизацијата на сè“ што влијае на политичките одлуки, според стратезите, треба да се очекува поголема нестабилност и пократки периоди помеѓу рецесиите.

Критичарите на САД сметаат дека доларот е привилегиран на глобалниот пазар. Така, поранешниот руски претседател Дмитриј Медведев тврди дека Вашингтон со своите постапки „ја уништува довербата во својата валута“.

Како предизвик за доларот во последните неколку децении се наведуваат големиот трговски, буџетски и тековниот американски дефицит, потоа високиот јавен долг, кој во комбинација со јакнењето на другите валути може да доведе до негово сузбивање, па дури и до колапс.

Сепак, еврото како втора најмоќна валута учествува со 20 насто од светските девизни резерви, а кинескиот јуан малку над два насто. Криптовалутите се покажаа како прилично нестабилни.

Затоа, како што истакнува Дејвид Џонс од Capital.com, „секој што очекуваше пад на американскиот долар оваа година беше многу разочаран бидејќи неговиот индекс го достигна највисокото ниво во последните две децении“. „Тоа е совршена бура за американскиот долар“, додава Џонс.

Од 1971 година, доларот е светска резервна валута. Потоа, на состанок на најголемите светски економски сили, американскиот министер за финансии Џон Конали ги шокираше своите колеги со изјавата дека доларот е „наша валута, но ваш проблем“.

Светска банка предупредува на можна глобална рецесија поради војната во Украина

Во тоа време, САД сакаа поевтин долар, принудувајќи ги другите да ги ревалоризираат своите валути, потсетува „Блумберг“. Половина век подоцна, глобалната економија се соочува со спротивен предизвик: доларот е на највисоко ниво во последните 20 години во однос на другите главни валути, што создава огромен проблем за секој надвор од САД кој купува стоки деноминирани во долари. Дури и цената на чајот, суштински британски пијалак, е индексирана во американска валута наместо во фунти.

Ова создава криза во платниот биланс во многу земји увозници на нафта, особено во Африка, Латинска Америка и Азија. Малави, една од најсиромашните нации во Африка, неодамна ја девалвираше својата валута за 25 отсто за еден ден. Шри Ланка, една од најсиромашните земји во Азија, е на работ на економски колапс.