Русија продолжи со гранатирање и ракетни напади во северниот украински град Чернихив и покрај тоа што вети дека ќе ја намали воената активност околу областа. Украинската војска се сомнева во руските ветувања и се подготвува за натамошни тешки борби на истокот. Претседателот Володимир Зеленски предупреди на акумулација на руски сили на југоисток додека се подготвуваат за нови напади.
Од друга страна, пак, вицепремиерката Ирина Верешчук изјави дека денеска 45 автобуси се упатиле кон опколениот пристанишен град Мариупол во обид да се евакуираат цивилите заробени од неколкунеделните тешки борби.
Видете и ова: Скептицизам кон руските ветувања за намалување на воените операции во УкраинаБританското Министерство за одбрана денеска соопшти дека руските војници продолжуваат да држат позиции на исток и запад од Киев и покрај повлекувањето на ограничен број единици и „најверојатно ќе се водат тешки борби во предградијата на градот во наредните денови“.
Шефот на британска разузнавачка агенција Џереми Флеминг денеска изјави дека деморализираните руски војници во Украина одбиваат да извршуваат наредби и ја саботираат сопствената опрема и случајно го собориле сопственото летало. Тој додаде дека рускиот претседател Владимир Путин очигледно „сериозно погрешно ја проценил“ инвазијата.
„Јасно е дека погрешно го процени отпорот на украинскиот народ. Тој ја потцени силата на коалицијата што би ја поттикнале неговите постапки. Тој ги потцени економските последици од режимот на санкции и ги прецени способностите на неговата војска да обезбеди брза победа“, вели во својот говор Флеминг.
Нови сателитски снимки откриваат колкаво е уништувањето во Мариупол
Во меѓувреме, директорката за комуникации на Белата куќа, Кејт Бедингфилд, на брифинг со медиумите изјави дека Путин бил заведен од советниците.
„Веруваме дека Путин е погрешно информиран од неговите советници за тоа колку лошо функционира руската војска и колку руската економија е осакатена од санкциите, бидејќи неговите високи советници премногу се плашат да му ја кажат вистината“, рече Бедингфилд.
Во одделни видео обраќања Зеленски денеска пред австралиските и холандските пратеници изјави дека се потребни нови и посилни санкции против Русија за да се засили притисокот врз Москва поради нејзината неиспровоцирана инвазија на Украина. Тој особено ги повика холандските пратеници да „запрат секаква трговија со Русија“. Зеленски им порача на белгиските пратеници дека мирот е „повреден“ од дијамантите и рускиот гас.
Русија на 29 март соопшти дека ќе ги намали операциите во близина на главниот град Киев и северниот град Чернихив „за да ја зголеми меѓусебната доверба“ за мировните преговори откако двете страни се сретнаа лице в лице во Истанбул. Сепак, официјалните претставници од двата града велат дека воздушните напади продолжиле и покрај ветувањето.
Столтенберг - Русија не се повлекува, само се репозиционира
Русија не ги повлекува своите војници во Украина, како што вети, туку само ги репозиционира, изјави денеска генералниот секретар на НАТО Јенс Столтенберг. Говорејќи на прес-конференција на 31 март, Столтенберг рече дека очекува движењето на војниците да резултира со „дополнителни офанзивни дејства“.
„Според нашите разузнавачки податоци, руските единици не се повлекуваат, туку се репозиционираат. Русија се обидува да се прегрупира, да се надополни и да ја зајакне својата офанзива во регионот на Донбас во источна Украина“, рече Столтенберг, мислејќи на регионите поддржани од Москва, контролирани од сепаратистите.
Тој вели дека истовремено, Русија го одржува притисокот врз Киев и другите градови.
„Значи, можеме да очекуваме дополнителни офанзивни дејства, кои ќе донесат уште повеќе страдања“, додаде Столтенберг.
Москва, исто така, соопшти дека ќе се фокусира врз воените операции во источните региони Луганск и Доњецк, попознати како Донбас, чии делови се најдоа под контрола на сепаратистите поддржани од Русија откако Русија незаконски го анектираше украинскиот полуостров Крим во 2014 година.
Мировните разговори требаше денеска да продолжат преку видео врска, иако аналитичарите се сомневаат дали Москва е искрена во постигнувањето напредок.
Зеленски бара од САД финансиска и воена поддршка
„Ако навистина заедно се бориме за слобода и за одбрана на демократијата, тогаш имаме право да бараме помош во оваа тешка пресвртница. Тенкови, авиони, артилериски системи. Слободата не треба да биде вооружена полошо од тиранијата“, рече Зеленски денеска во своето обраќање до Украинците.
Зеленски и американскиот претседател Џо Бајден претходно разговараа за специфична одбранбена поддршка, нов пакет санкции против Русија и финансиска и хуманитарна помош во едночасовен телефонски разговор.
Тие разговараа и за критичното влијание на испораките на оружје врз конфликтот и континуираните напори за идентификување на дополнителните капацитети за да и се помогне на војската на Украина да ја одбрани земјата.
Официјален Пентагон рече дека сè уште не е испорачано целото оружје што Бајден го вети во средината на март.
Во меѓувреме, Европската банка за обнова и развој (ЕБРД) предупреди за катастрофалниот ефект од војната врз руската и украинската економија.
Европската банка за развој со седиште во Лондон денеска соопшти дека руската економија ќе се намали за 10 отсто оваа година, додека украинската ќе се намали за 20 отсто, бидејќи војната меѓу двете земји предизвикува најголемиот шок за снабдување во пола век.