Жените поподложни на последиците од топлото време

Влијанијата на зголемената топлина се несразмерно опасни за жените, било да е тоа дома или на работа, се наведува во извештајот насловен како „Жешката поделба“ на Центарот за отпорност на Фондацијата Адриен Аршт-Рокфелер, пренесува Ројтерс.

Истражувањето на непрофитната организација со седиште во Соединетите Држави, кое ги анализираше Индија, Нигерија и САД, наведува дека екстремната топлина може да убие 204 000 жени годишно во трите земји во жешките години.

„Екстремната топлина тивко, но длабоко ги уништува жените ширум светот“, рече Кети Багман Меклаод, директорка на фондацијата Аршт-Рок.

Топлината создава „двојно оптоварување“ за жените, се предупредува во извештајот.

„Жените не само што се поподложни физички да се разболат од топлина, туку и од нив непропорционално се очекува да се грижат за сите други болни од последиците од топлината, без разлика дали тоа е платена нега или неплатена нега“, изјави Меклод за Фондацијата „Томсон Ројтерс“.

Топлотните бранови најмногу ги погодуваат жените

Топлотните бранови уриваат рекорди ширум светот, а според научниците континуираното ослободување на емисиите за загревање на планетите, главно од употребата на јаглен, нафта и гас ќе ги „турка“ глобалните температури на непозната територија во наредните години.

„Исцрпувачката топлина ќе го земе својот данок врз жените, принудувајќи ги да работат подолго време, без разлика дали работат на отворено на пример, или на неплатена домашна работа како што е готвење и чистење без никаков приход“, се вели во извештајот.

„Жените во сиромаштија дополнително се туркаат кон сиромаштија, а жените кои излегуваат од сиромаштијата, повторно се повлекуваат назад“, рече Меклеод.

Со оглед на тоа што просечниот број на денови на топлотен бран се предвидува да се удвои до 2050 година во Индија, Нигерија и САД, жените од најсиромашните и маргинализираните заедници ќе претрпат најголем удар врз нивната продуктивност, се наведува меѓудругото во извештајот.

Според заклучоците на истражувањето, голем дел од овие загуби на продуктивноста поврзани со топлината (поврзани со околу 120 милијарди долари секоја година во трите земји) се во контекст на неплатена работа во домаќинството и се поврзани со недостигот на пристап до домашна опрема за ладење.

Околу 1,2 милијарди рурални и урбани сиромашни на глобално ниво се очекува да живеат без решенија за ладење до 2030 година, од кои 323 милиони само во Индија, покажа организацијата Одржлива енергија за сите (SEforALL), поддржана од ОН која работи на добивање пристап до енергија.

Овие решенија се движат од домашна климатизација до синџири за ладење на земјоделски производи.

„Жените поминуваат речиси двојно повеќе време од мажите работејќи дома, се грижат за децата или постарите роднини и управуваат со куќата, а оние кои не можат да си дозволат клима се подложени на поголем удар за нивната продуктивност,“ се вели во извештајот.

Во земјите како што е Нигерија, каде што топлината ги влошува симптомите на тропските болести од маларија до жолта треска, мајките го носат „двојниот товар“ да се грижат за себе и да се грижат за болните членови на семејството, што е всушност часови неплатена работа.

Лекарите во Нигерија, кои имаат чести прекини на струја, повикуваат на подобро проветрени болници и велат дека бремените жени треба да прават паузи од најмалку три часа ако работат на отворено.

„Трудниците се изложени на поголем ризик од смртни случаи поврзани со топлина, бидејќи зголемувањето на температурата влијае на растот на фетусот и го комплицира целокупното здравје на идната мајка“, рече Самуел Адебајо, гинеколог од Лагос.

Нигерија е одговорна за 20% од глобалните смртни случаи на мајки или тоа е околу 58 илјади жени годишно, се вели во извештајот на Аршт-Рок, каде што се цитираат податоци од Светската здравствена организација (СЗО).

„Во Британија, каде жените од црните заедници имаат речиси четири пати поголема веројатност да умрат при породување, климатските промени само ќе ги влошат предизвиците со кои се соочуваат“, смета Селваселан Селварајах, доктор од источен Лондон.

„И додека богатите можат да си дозволат уреди за ладење и трошоци за струја, сиромашните не можат,“ рече Селварајах.

„Во сиромашните станови, дури и ако советот ви даде клима, вие плаќате стотици фунти месечно за електрична енергија и поради тоа нема да сакате да ја вклучите“, наведува докторот.

Невидливиот труд е поголем товар за жените

Земјоделката Савитри Деви (40) од северната индиска држава Утар Прадеш, работеше на полињата на температури до 44 степени Целзиусови, дури и кога голем број луѓе загинаа за време на топлотниот бран во државата во јуни.

Жените во Индија губат речиси една петтина од платените работни часови за да се загреат, а екстремните горештини ги туркаат женските плати под прагот на сиромаштија во секторите вклучително и земјоделството, кое сочинува 70% од вкупната вработеност на жените, се вели во извештајот.

„Очигледно страдав работејќи на сонце. Се разболев и ми беа намалени приходите за секој изгубен час поради жештината. Но, што да правам? Морам да работам за пари“, рече Деви, која заработува само 3,05 долари за осум часа работа дневно.

Експертите за труд велат дека зголемената топлина го влоши проблемот, особено во руралните средини. Бидејќи сушите ја намалуваат жетвата на земјоделските култури и ја поттикнуваат миграцијата на мажите од селата во потрага по алтернативна работа, жените остануваат сами и треба да се грижат за фармите и семејствата.

Беној Питер, извршен директор на Центарот за миграција и инклузивен развој, непрофитна организација со седиште во Керала, рече дека најголемиот дел од земјоделската работа во рурална Индија ја сочинува „невидливиот труд од жените“ кои преземаат поголем товар кога мажите мигрираат во градовите.

„Значи, жените работат на полињата, се грижат за постарите луѓе и децата. Но, ако се разболат, нема кој да ги однесе во здравствена установа“, вели Питер.

Меклеод од Аршт-Рок вели дека луѓето почнуваат да ги разбираат ефектите од топлината и од финансиска и од здравствена перспектива. Затоа и ја нагласи потребата да се преземе итна акција за ова прашање.

„Оваа криза, со оглед на тоа до каде се нашите емисии, само се влошува. Никој не мора да умре од топлина. Сите овие смртни случаи и болести може да се спречат. Се надеваме само дека луѓето ќе обрнат повеќе внимание за однесувањето,“ заклучува Маклеод.