Украинскиот претседател Володимир Зеленски објави дека руски дрон со експлозивна боева глава удрил во засолништето кое го штити светот од радијација во уништениот четврти реактор на нуклеарната централа Чернобил.
Украински извори објавија и видео од инцидентот.
„Ова засолниште го изгради Украина заедно со другите европски земји и Америка – со сите оние кои се посветени на вистинската безбедност на човештвото. Единствената земја во светот која напаѓа такви објекти, окупира нуклеарни централи и води војна без никакво внимание на последиците е денешна Русија. Ова е терористичка закана за целиот свет“, објави Зеленски.
Тој додаде дека во нападот е оштетено засолништето во нуклеарната централа во Чернобил и дека пожарот е изгаснат.
„Нивото на радијација засега не е зголемено и постојано се следи. Според првичните проценки, штетата на засолништето е значителна“, истакна украинскиот претседател.
Тој нагласи дека Русија секоја вечер врши слични напади врз украинската инфраструктура и градови и не покажува знаци на подготвеност за преговори.
„Путин не се подготвува за преговори, туку за продолжување да го залажува светот. Затоа, потребен е заеднички притисок од сите што го ценат животот - притисок врз агресорот. Русија мора да одговара за своите постапки“, заклучи Зеленски.
Вашиот пребарувач не подржува HTML5
„Тие мора да вратат сè“: Украинците за предложената размена на територии
Неговата изјава доаѓа во време на напорите на администрацијата на американскиот претседател Доналд Трамп да преговара за крај на војната што рускиот претседател Владимир Путин ја започна против Украина пред речиси три години.
Нуклеарната катастрофа во Чернобил, која се случи на 26 април 1986 година, се смета за најлошата нуклеарна несреќа во историјата. Експлозијата во четвртиот реактор на нуклеарната централа Припјат, во тогашна советска Украина, предизвика ослободување на огромни количини на радиоактивни честички во атмосферата.
Инцидентот е резултат на низа технички грешки и човечко невнимание за време на безбедносното тестирање кое тргнало наопаку. Последиците од експлозијата се почувствуваа веднаш – во часовите по несреќата загинаа двајца работници на електраната, а десетици беа хоспитализирани поради акутна радијациона болест.