Косовскиот премиер Албин Курти изјави дека Договорот за нормализација на односите со Србија од минатата година треба да се имплементира, а од Европската комисија очекува „дополнително инсистирање“ на неговото потпишување.
„Тоа е најновиот договор што го имаме и тоа е договор во кој учествував и го прифатив“, рече Курти на прашањето дали Вашингтонскиот договор би бил прифатлив за него, доколку новата американска администрација инсистира на негово спроведување.
Да почнеме со последниот договор, кој е сеопфатен договор бидејќи ги нормализира односите меѓу Косово и Србија преку меѓусебно дефакто признавање“, додаде Курти.
Минатата година Косово и Србија го прифатија Договорот за патот кон нормализирање на односите во рамките на дијалогот со посредство на Европската унија.
Договорот, меѓу другото, предвидува Белград да не го спречува членството на Косово во меѓународните организации, меѓусебното признавање на државните симболи и територијалниот интегритет.
Приштина, пак, треба да формира Заедница на општини со српско мнозинство, што на припадниците на српската заедница би им обезбедило одредено ниво на самоуправување.
Видете и ова: ЕУ го повика Косово без одлагање да формира Заедница на општини со српско мнозинствоОвој договор не е спроведен, а премиерот Курти инсистира тој да биде потпишан, иако ЕУ неколку пати најави дека е правно обврзувачки за двете страни.
Договорот од Вашингтон претходно беше потпишан во Белата куќа во 2020 година од тогашниот премиер на Косово, Авдула Хоти и претседателот на Србија, Александар Вучиќ.
Договорот главно се однесуваше на економската нормализација на односите меѓу Косово и Србија, додека Курти подоцна остро го критикуваше, наведувајќи дека е неуставен.
Премиерот Курти рече и дека ќе има соработка и комуникација со новата администрација на чело со Доналд Трамп.
„Трамп, во писмото упатено до еден од моите претходници, исто така фундаментално го утврди меѓусебното признавање како нешто од централно значење за идните односи меѓу Косово и Србија и сакаме, подготвени сме, да ја продолжиме оваа соработка, а зошто да не ја прошириме и продлабочиме“, рече Курти.
За време на претходната администрација на Доналд Трамп (2017-2020), Курти немаше добри односи со неговиот пратеник за дијалог меѓу Косово и Србија, Ричард Гренел.
Курти го обвини Гренел за директно мешање во политичката криза во Косово и соборувањето на неговата влада во март 2020 година.
Гренел, од друга страна, го обвини Курти дека има „антиамерикански“ ставови и дека се спротивставува на американската политика предложена од поранешните претседатели Бил Клинтон, Барак Обама и Доналд Трамп.