Црвена боја и камења беа фрлани кон Градското собрание на Нови Сад на протестот на 5 ноември вечерта на кој неколку илјади луѓе бараат одговорност од властите за смртта на 14 лица при уривањето на настрешницата на Железничката станица во тој град што се случи на 1 ноември.
Групи мажи, главно со маски и качулки, почнаа да фрлаат со камења и други предмети кон седиштето на градската власт. Тие ја скршија влезната врата и прозорците.
Полициски сили во опрема за разбивање демонстрации, стационирани во Градското собрание, одговорија со солзавец.
Протест во Нови Сад, Србија, 5 ноември 2024 година
Судирите траеја речиси три часа и продолжија на улиците во близина на Градското собрание.
Полицијата приведе дел од учесниците во нередите.
По конфликтот со полицијата во цивилна облека, приведен е и опозицискиот политичар и поранешен потпретседател на Владата на Војводина, Горан Јешиќ.
Опозицијата која повика на протест се огради од инцидентите со порака дека се работи за луѓе кои биле донесени за да предизвикаат насилство.
Протест во Нови Сад, Србија, 5 ноември 2024 година
Миша Бачулов од Здружението на граѓани „Биди херој“, кој на последните избори беше кандидат за градоначалник на Нови Сад, ја повика толпата да не прави нереди.
Тој апелираше до полицијата да ги отвори вратите на Градското собрание за да ги предаде барањата на присутните на протестот.
Демонстрантите, кои се собраа на покана на парламентарните опозициски партии и здруженија на граѓани, бараат оставка од српскиот премиер Милош Вучевиќ и градоначалникот на Нови Сад, Милан Ѓуриќ, како и итно апсење и казнување на одговорните за несреќата на Железничка станица.
Тие бараат и јавен увид во договорот со кинескиот конзорциум кој ја реконструираше станицата.
Последното барање е да се објават други тајни договори со приватни компании кои се занимаваат со клучни инфраструктурни проекти во земјата.
Нови Сад, Србија - Инциденти на протестот по уривањето на настрешница на Железничката станица, 5 ноември 2024 година.
Демонстрантите донесоа трактор со фекалии пред седиштето на градската власт и го истурија пред Градското собрание.
„Овие фекалии го симболизираат она што тие нам ни го прават со години“, рече Бачулов.
Претходно, неколку илјади луѓе ја блокираа раскрсницата пред Железничката станица и бараат да се утврди кривична, но и политичка одговорност по несреќата на Железничката станица.
Србија - Протест во Нови Сад, 5 ноември 2024 година.
Насобраните луѓе носат голем транспарент на кој пишува „Вие сте виновни, ќе одговарате“. Во првите редови се и фотографиите на загинатите во несреќата, меѓу кои има и деца. Толпата извикува „Оставка“, „Апсете“ и „Уапсете ја бандата“.
Во пресрет на собирот во Нови Сад беше распоредено силно полициско обезбедување.
Младите, меѓу кои беа и членовите на неформалната групи „Став“, во пресрет на протестот ги симнаа знамињата од просториите на Градскиот комитет на владејачката Српска напредна партија(СНС) и залепија фотографии од функционерите чија одговорност бараат на излозите, со порака „Корупцијата убива, ќе одговарате“.
Видете и ова: Што досега се знае за несреќата во Нови Сад?Српскиот претседател Александар Вучиќ дојде во Нови Сад во текот на вечерта и се обрати на толпата пред Градскиот комитет на владејачката Српска напредна партија. Вучиќ им порача на своите поддржувачи дека ќе бидат казнети сите одговорни за немирите во Нови Сад.
Претходно, во видео што го објави на профилот на Инстаграм, Вучиќ вели дека во Нови Сад не бил организиран комеморативен протест, туку „страшни напади врз неистомислениците“, а Градското собрание било нападнато „не само со боја, туку и со камења“, и дека се „нападнати полицајци“.
„Во Нови Сад се во тек грозоморни, насилни протести против државата Србија. Србија ќе го брани своето знаме, своето име и презиме и ќе ги казни сите сторители на криминални дела. Не се сомневајте во тоа“, рече Вучиќ.
Тој во видеото вели и дека полицијата е многу воздржана, но никој да не мисли дека насилство е дозволено, а „секој што учествувал ќе биде казнет и кривично гонет од државата“.
Поранешниот министер за градежништво, транспорт и инфраструктура, Горан Весиќ, на 5 ноември поднесе оставка од функцијата, но рече и дека не ја прифаќа вината за несреќата.
Засега не се познати причините за уривањето на бетонската настрешница на Железничката станица во Нови Сад.
Железничката станица во Нови Сад беше официјално отворена во јули 2024 година, по тригодишна реконструкција.
Надлежните соопштија дека бетонската настрешница пред главниот влез на зградата на станицата која се урна не е вклучена во реконструкцијата.
Вишото јавно обвинителство во Нови Сад до 5 ноември сослуша 48 лица, меѓу кои и министерот за градежништво на Србија Горан Весиќ, директорот на Заводот за заштита на спомениците на културата во Нови Сад, одговорните за „Железници Србија“ и „Српски Железничка инфраструктура“ и одговорните за извршување на работите.
По несреќата, во Нови Сад и во Белград беа одржани неколку протести на активисти.
Меѓу 14 лица кои загинаа има и еден македонски државјанин. Уште три лица беа повредени и се во тешка состојба.