Зеленски ќе им го претстави „Планот за победа“ на лидерите на НАТО и ЕУ

Украинскиот претседател Володимир Зеленски се очекува на 17 октомври да им ги претстави на лидерите на ЕУ и НАТО деталите од неговиот „План за победа“- збир на мерки за кои вели дека ќе го свртат бранот на војната во корист на Кие. Тој се обидува да ги убеди западните сојузници да ја поканат Украина да се приклучи на алијансата и да обезбеди поголема воена помош пред тешката зима на бојното поле и во нејзините погодени градови.

Додека Зеленски се подготвува да го претстави својот предложен план во Брисел прво на самитот на лидерите на Европската Унија, а потоа и на состанокот на министрите за одбрана на НАТО, Украина беше подложена на нов бран напади со беспилотни летала кои беа насочени кон Киев и критичната енергетска инфраструктура на југ.

Украинскиот лидер делумно ги откри мерките за кои верува дека би можеле да стават крај на војната „најдоцна до следната година“. Тој ќе го претстави планот од пет точки, за кој рече дека има три тајни додатоци, на главните западни сојузници на Украина, вклучувајќи го и американскиот претседател Џо Бајден и лидерите на Велика Британија, Франција, Германија и Италија.

Видете и ова: Кремљ го отфрли „Планот за победа“ на Зеленски

Едно од главните барања на Зеленски е повикување на „укинување од страна на партнерите на ограничувањата за употреба на оружје со долг дострел на целата територија на Украина окупирана од Русија и на руска територија и на непријателската воена инфраструктура“, како и помош во „опремувањето на нашите резервни бригади.

Зеленски на 17 октомври рече дека повторно разговарал за планот за време на телефонскиот разговор со Бајден претходната вечер.

„Благодарен сум му на претседателот Бајден, на двете страни во Конгресот и на американскиот народ за одбранбениот пакет од 425 милиони долари објавен денеска, кој вклучува нови системи за противвоздушна одбрана и оружје со долг дострел“, напиша Зеленски на мрежата X.

Видете и ова: Зеленски презентираше делови од „Планот за победа“ пред украинските пратеници

Планот, кој ја исклучува можноста за отстапување на украинска територија, исто така повикува на покана за Киев да се приклучи на воената алијанса на НАТО и распоредување на стратешки ненуклеарен пакет за одвраќање во Украина.

НАТО не даде јасен рок за прикучување на Украина во Алијансата, а рускиот претседател Владимир Путин рече дека намерата на Киев да се приклучи на алијансата е една од причините за руската инвазија.