Со сет мерки Владата во текот на 2025 година ќе го зголемува бројот на патници на скопскиот и охридскиот аеродром. Со новата програма што ќе започне од 1 јануари 2025 година и ќе трае до 31 декември 2027 година се планира на годишно ниво сума од 125 милиони денари или вкупно 375 милиони денари за поддршка на авиосообраќајот или за еден милион евра повеќе од досега планираното, најави денеска вицепремиерот и министер за транспорт Александар Николоски и додаде дека повикот за субвенциониран авиопревоз ќе биде објавен следната недела.
„Сетот на мерки кои ќе ги преземеме во 2025 година траба да донесат во Македонија 200 илјади патници повеќе од досега, а во годините што следуваат тој број и да се зголемува, рече Николоски на денешната прес-конференција во Владата.
Компаниите би требало да имаат превезено најмалку пет милиони патници во текот на 2023 година и да имаат најмалку 10 милиони евра профит. Покрај тоа, повеќе нема да се субвенционираат авиокомпании, туку дестинации што значи дека повикот ќе биде отворен за сите авиокомпании кои ги исполнуваат условите за секоја засебна дестинација, потенцира Николоски.
Видете и ова: Што треба да знаат граѓаните на Западен Балкан за новите правила за влез во ЕУ?На овој начин, додаде, се решава проблемот со зависност од една авиокомпанија, а токму тоа е причината за намалувањето на патници од скопскиот и охридскиот аеродром од над 330 илјади патници годинава заради проблемот што го има „Визер“ со сопствените авиони што на ниеден начин не е поврзан со состојбата во земјава.
„Досега се субвенционираше по патник на заминување од Македонија, а сега ќе се субвенционира на доаѓање зашто целта ни е во Македонија да носиме туристи и да им овозможуваме на полесен, побрз и поевтин начин да дојдат, рече Николоски.
Се зголемува, прецизира, поддршката од седум евра по превезен патник од скопскиот аеродром на девет евра, а на охридскиот аеродром наместо 4,5 евра како досега ќе се доделуваат 12 евра по превезен патник.