Основното јавно обвинителство - Скопје поднесе жалба на пресудата на Кривичниот суд за случајот со автобуската несреќа на автобус на „Дурмо турс“ кај Ласкарци во февруари 2019 година, во која загинаа 16 лица, а 38 беа повредени.
Обвинителството бара повисоки казни за четворица обвинети - Д.Б., Р.М., И.Ѓ. и Г.Д и подолго времетраење на казните забрана за вршење професија, дејност или должност.
Според Обвинителството, судот погрешно ги ценел олеснувачките и отежнувачките околности, како и индивидуалната одговорност на обвинетите за несреќата.
„Животите на патниците кои се превезувале не само во предметниот автобус, туку и во другите автобуси и останатите учесници во јавниот сообраќај биле директно загрозени од начинот на кој обвинетите ги извршувале своите законски обврски“, пишува во жалбата, соопшти Обвинителството.
Обвинителството потсетува дека во континуитет предметниот автобус бил прогласуван за технички исправен иако воопшто не бил прегледуван, а 16 дена по последниот наводно извршен технички преглед, превозникот „Дурмо турс” вршел јавен превоз на патници со тој автобус без да биде сообраќајно регистриран. Манипулација со брзината на движење и „штелување” на тахометрите, за да не се плаќаат казни не само на конкретниот автобус, туку и на други автобуси, било исто така прифатено како правило.
Несреќата се случи кога автобус на „Дурмо турс“, на релација Скопје-Гостивар, со 51 патник, сите од Гостивар, излета од автопатот Тетово-Скопје и падна во провалија откако ја пробил заштитната ограда на автопатот.
Шестмина осудени за несреќата добија вкупно 39 години затвор. Обвинението беше поднесено уште во јули 2019 година, на само 5 месеци по несреќата, но предметот со години остана заглавен во формални процедури во судот.