Компанијата Мета предупреди дека открила хакерски обид поврзан со Иран при што била користена апликацијата за пораки WhatsApp, во пресрет на претседателската кампања во САД.
Гугл и Мајкрософт претходно открија слични обиди што ги поврзаа со Иран.
„Оваа злонамерна активност потекнува од Иран и се обиде да погоди поединци во Израел, Палестина, Иран, САД и Обединетото Кралство“, соопштија од Мета.
Во соопштението се додава дека „оваа активност се чини дека се фокусирала на политички и дипломатски функционери и други јавни личности, вклучително и некои поврзани со администрациите на претседателот на САД, Џо Бајден и поранешниот претседател Доналд Трамп“.
Претходно, три американски разузнавачки и безбедносни агенции соопштија дека Иран стои зад неодамнешниот хакерски напад насочен кон претседателската кампања на Трамп и го обвинија Техеран дека се обидува да влијае на изборите во 2024 година.
Претседателските избори во САД ќе се одржат на 5 ноември.