Либански Хезболах лансираше повеќе од 50 ракети во Голанската висорамнина

Либански Хезболах денеска (21 август) лансираше повеќе од 50 ракети во Голанската висорамнина, погодувајќи многу приватни домови.

Еден маж (30) се здобил со полесни повреди од шрапнел во нападот, а една куќа била зафатена во пламен, пренесе агенцијата АП.

Хезболах соопшти дека нападот бил одговор на израелскиот напад длабоко во Либан во вторникот вечерта, во кој загина еден човек, а 19 лица беа повредени.

Хезболах, исто така, истрела повеќе од 200 проектили кон Израел во вторникот, откако Израел погоди складиште за оружје на Хезболах на околу 80 километри од границата.

Израел и Хезболах речиси секојдневно разменуваат прекуграничен оган од почетокот на војната во Појасот Газа пред десет месеци.

Видете и ова: Најмалку девет луѓе загинаа при израелски напад во јужен Либан

Израел ја освои Голанската висорамнина од Сирија во блискоисточната војна во 1967 година, а подоцна ја анектираше.

Соединетите Држави се единствената земја што ја призна анексијата на Израел, додека остатокот од Меѓународната заедница го смета Голан за окупирана сириска територија.

Нападот доаѓа во период кога САД, Катар и Египет ги интензивираат разговорите за прекин на огнот во Појасот Газа.

Израелскиот министер за одбрана Јоав Галант изјави дека израелската армија го насочува вниманието од Појасот Газа кон границата со Либан.

За време на турнејата на северниот дел на Израел во вторникот, Галант рече дека Израел ги намалил своите активности во Појасот Газа и го префрлил својот фокус на милитантите на Хезболах во Либан.