Министерството за внатрешни работи (МВР) проверува дали претседателот на Собранието на Северна Македонија Африм Гаши со службено возило заминал во Косово, откако косовски медиуми објавија снимки во кои наводно од мобилен телефон бил снимен службениот автомобил на Гаши во редица на свадбена поворка во Косово.
Од МВР велат дека надлежните служби во моментов вршат „соодветни проверки со цел утврдување на фактичката состојба“.
„По што соодветно ќе ја известиме јавноста“, велат од Министерството за внатрешни работи, во одговорот до медиумите.
Инаку, видеото кое наводно го покажува службеното возило на Гаши го објави порталот Индекс, кој во описот на видеото наведува „Африм Гаши со службен автомобил оди да ја земе невестата“.
Видете и ова: Опозицијата бара промена на Гаши, власта не се согласуваЗасега нема реакции од Владата, но опозициската Либерално демократска партија (ЛДП) прашува дали Гаши носел со себе патен налог и како може да го оправда патувањето и употребата на службеното возило.
Инаку, Гаши на почетотко на месецов беше вклучен во инцидентот кога косовската министерка Вјоса Османи требаше да полета од Меѓународниот аеродром во Скопје.
Министерството за внатрешни работи (МВР) тогаш соопшти дека шефот на обезедувањето на Гаши, со уште двајца членови на тимот, по наредба на спикерот, дошол пред ВИП салонот на аеродромот, дури и репетирал пиштол и влегол во конфликт со полицајците стационирани таму, барајќи одговор зошто се инсистирало косовската претседателка да помине низ безбедносна контрола на аеродромот.
Одделот за внатрешна контрола на МВР го суспендираше шефот на обезедувањето, и отвори постапка против другите двајца телохранители.