Се проверува дали има оштетени реагенси во Институтот за јавно здравје, откако вчера некој ги исклучил фрижидерите во кои се чуваат, потврдува за МИА, директорката Марија Андоновска, која очекува Јавното обвинителство да покрене постапка околу тоа кој имал пристап и до осигурувачите за струја за фрижидерите каде се чуваат реагенси за целата држава. Од Институтот, за случајот ги информирале сите надлежни државни органи.
„Можно е ова да се има случено во периодот помеѓу 14:30 и 15:30 часот. Фрижидерите и коморите што ги имаме се во посебни простории под клуч. Во случајов се работи за широк ходник во кој лево и десно има лаборатории, а во кој исто така се сместени разводни табли со осигурувачи за струја во фрижидерите. Среќа што ние бевме сe уште на работа и хигиеничарката, која доаѓа по вработените кои заминуваат, забележа дека има некаков проблем кај разводните табли, таа алармираше“, појаснува директорката.
Симптоматично е, рече таа, тоа што биле исклучени само тие што се однесуваат на фрижидерите и коморите, каде се чуваат сите реагенси за целата држава.
„Ако не бевме тука и не реагиравме веднаш, денеска ќе имавме огромно загрозување на општата состојба на граѓаните, загрозување на животот и здравјето нивно, согласно на кривичниот закон, дополнителна штета во милиони. Ќе немавме ниту еден реагенс. Среќа што бевме таму и веднаш реагиравме, повикавме институции да го утврдат тоа и очекуваме дека Јавното обвинителство ќе реагира. Последиците ќе беа ненадоместливи, среќа што бевме таму“, подвлече Андоновска.
Видете и ова: Дали големите ветувања ќе го станат здравството од постела?Во меѓувреме од ОЈО соопштија дека итно е оформен предмет по допрен глас за да испита дали во конкретниот случај има обележја на кривично дело.
„Поради сериозноста на можните штетни последици врз здравјето на луѓето што евентуално би биле предизвикани од еден таков чин, како и можноста да станува збор за кривични дела против државата како што се диверзија или саботажа, дежурните јавни обвинители од Основното јавно обвинителство Скопје и од Основното јавно обвинителство за гонење на организиран криминал и корупција, заедно со истражители од истражните центри на обвинителството, излегоа на лице место и преземаат увидни дејствија“, се вели во соопштението на ОЈО.
Инаку во моментот во ИЈЗ се преземаат безбедносни мерки за алармирање, доколку некој чепка во тие разводни табли. Првичните информации, според директорката, се дека тоа го има направено, некој што точно знае каде треба да се исклучи за да останат баш тие фрижидери без струја, затоа што само тие биле исклучени.
По вакво нешто, таа рече дека ќе бара дозвола за поставување камери од Министерството за внатрешни работи.
Во моментов се испитува дали има уништени реагенси, се зема мостра од сите нив. Стручната проверка ќе покаже дали има штета или не, на некои од тие реагенси, бидејќи, како што рече, секој од нив си има колку време може да стои на одредена температура.