Управен суд оформи предмет за тужбата од Европскиот фронт за прегласувањето во Желино

Управниот суд соопшти дека е оформен предмет за тужбата што синоќа ја поднесе Коалицијата „Европски фронт“ на решението на Државната изборна комисија (ДИК) за прегласувањето на изборното место 2101 во село Ларце во Општина Желино.

Рокот за одлучување од страна на Управниот суд е 48 часа по приемот на тужбата.

„Управниот суд ја известува јавноста дека на ден 28.05.2024 година по поднесенa тужба од Коалиција Европски фронт на Парламентарните избори 2024 против решение на Државната изборна комисија е оформен предмет. Со оглед на роковите за постапување и одлучување, Управниот суд итно ги презема сите процесни дејствија согласно Изборниот законик“, наведува Управниот суд во објава на веб-страницата.

Видете и ова: Поранешни министри, лекари и директори се новите пратеници

ДИК завчера на седница не го прифати приговорот од Европскиот фронт за прегласувањето во Ларце каде Европскиот фронт загуби еден пратеник во однос на резултатите од 8 мај, а Коалицијата „Вреди“ доби еден пратенички мандат.

Според првичните резултати по прегласувањето во седум избирачки места во изборните единици 5 и 6 на парламентарните избори 2024, Коалицијата „Твоја Македонија“ предводена од ВМРО-ДПМНЕ останува со 58 пратенички мандати, Коалицијата „Европски фронт“ предводена од ДУИ загуби еден пратеник и има 18 пратенички мандати, исто колку и Коалицијата за европска иднина предводена од СДСМ.

Коалицијата „Вреди“ по прегласувањето доби еден пратеник повеќе и сега има 14, додека Движење ЗНАМ за наша Македонија и Левица остануваат со по шест пратенички мандати.