Неприфатлива за Грција е логиката на Гордана Сиљановска-Давкова, претседателка на Северна Македонија, да го употребува уставното име во формална комуникација, но не и во јавни настапи, рече Павлос Маринакис, портпарол на грчката влада, пренесе МИА.
Маринакис рече дека кога станува збор за највисоката позиција, за позицијата претседател на државата, „за еден од столбовите на демократијата на една земја, не можеме да говориме за двоен јазик и лично право“.
„Мислам дека е лицемерно ова да се кажува и да се слуша. За некои работи, каде што треба, ќе бидеме формални, а во нашите јавни настапи ќе го правиме она што сакаме или затоа што веруваме во тоа или затоа што ѝ служиме на нашата публика. Ова не може да биде прифатено од Грција, ниту од која било друга сериозна земја. Кога велиме дека треба да се согласиме дека треба да се почитува еден договор, затоа што таква е нашата обврска од фактот што е ратификуван овој договор, да го правиме тоа во сите наши формулации“, рече Маринакис.
За трите меморандуми за соработка кои СИРИЗА вчера ги достави во грчкиот Парламент, владиниот портпарол рече дека е „еден од најнесфатливите потези на опозицијата“,
„Ниту еден грчки граѓанин не сфаќа на што му служи оваа постапка, зошто такво брзање. Од моментот кога претседателката на Северна Македонија не ја прифаќа основната, првата точка од Договорот, главната опозиција во Грција сака ние сè да направиме, сè да изгласаме“, рече Маринакис и додаде дека доколку видат соодветна позиција од новата Влада, тогаш ќе влезат во конкретната дискусија.
Кога ја даваше свечената заклетва во Собранието, Сиљановска-Давкова употребуваше само Македонија за името на државата, без додавката „северна“. Тоа предизвика реакции од меѓународната заедница и од властите во Грција и во Бугарија.
Пораката е дека од почитувањето на Договорот од Преспа постигнат со Грција во 2018, како и Договорот за добрососедство со Бугарија од 2017, зависи и понатамошниот пат на Северна Македонија кон полноправно членство во ЕУ.