Ерменија во саботата го обвини Азербејџан дека во текот на ноќта го засилил прекршувањето на примирјето долж ерменско-азербејџанската граница по разговорите на премиерот Никол Пашинијан со највисоките претставници на САД и Европската Унија.
Ерменското Министерство за одбрана соопшти дека азербејџанските сили отвориле оган врз нивните позиции на повеќе делови од границата. Оттаму обвинија за „активно движење“ на азербејџански воени возила во една од тие области.
„Забележително е дека во текот на ноќта повеќето истрели од огнено оружје од азербејџанските вооружени сили биле нецелни и спорадични“, се вели во соопштението на Министерството.
Видете и ова: ЕУ и САД ветија помош за Ерменија додека се оддалечува од МоскваВо соопштението се сугерира дека тие се обиделе да ја испровоцираат ерменската страна да преземе „контрамерки“ кои би можеле да се искористат за поткрепување на „неодамнешните азербејџански дезинформации“ за кршење на примирјето.
Ерменските трупи „не презедоа дејствија што придонесуваат за понатамошна ескалација“, се вели во соопштението.
Ерменското Министерство за надворешни работи ги осуди „провокативните акции“ на Азербејџан. Наведуваат дека Ерменија „не е заинтересирана за ескалација на ситуацијата во регионот“.
Во меѓувреме, азербејџанското Министерство за одбрана соопшти дека неговите гранични трупи биле под прекуграничен ерменски оган во петокот вечерта. Не ги наведоа локациите каде се случувало тоа.
Двете страни веќе се обвинија меѓусебно за кршење на договорот за прекин на огнот претходно оваа недела. Тоа уследи по тврдењата на Азербејџан дека Ерменија собира војници долж границата како можна подготовка за „воени провокации“ таму. Ерменската војска негираше. Набљудувачката мисија на ЕУ, распоредена на ерменската страна на границата, исто така, негираше какво било воено засилување на Ерменија таму.
Видете и ова: Пашинијан - Започна демаркацијата на ерменско-азербејџанската границаТензиите на границата почнаа да растат откако Баку ги прозва американскиот државен секретар Антони Блинкен и претседателката на Европската комисија Урсула фон дер Лајен дека одлучиле да одржат трилатерална средба со Пашинијан во петок во Брисел. Ги обвинија западните сили дека се на страната на Ерменија.
И Блинкен и фон дер Лајен телефонираа со азербејџанскиот претседател Илхам Алиев пред разговорите во Брисел. Алиев во петокот инсистираше на тоа дека разговорите се „насочени против Азербејџан“.