Рекорден број на егзекуции во Иран, објави Амнести

Егзекуциите во Иран достигнаа највисоко ниво за осум години во 2023 година, се вели во новиот извештај на Амнести интернешенел.

Минатата година, во Иран беа извршени 853 егзекуции, со најмалку 481 егзекуција за пресуди за дрога, според извештајот објавен од организацијата на 4 април.

„Смртната казна е одвратна во сите околности, но масовно да се применува за прекршоци поврзани со дрога по крајно нефер судења пред Револуционерниот суд е гротескна злоупотреба на моќта“, рече Дијана Елтахави, заменик регионален директор на Амнести за Блискиот Исток и Северна Африка.

„Смртоносната политика против наркотици на Исламската Република придонесува за циклус на сиромаштија и системска неправда и дополнително ја зајакнува дискриминацијата против маргинализираните заедници, особено угнетеното иранско малцинство“, додаде Елтахави.

Извештајот на Амнести, исто така, ја обвини владата дека ја користи смртната казна како оружје против дисидентите демонстранти и припадниците на угнетените етнички малцинства и повика на „силен глобален одговор“ и притисок врз Техеран да спроведе мораториум на смртната казна.

Видете и ова: Амнести го повика Пакистан да ја запре депортацијата на авганистанските жени

Откако бранот протести го зафати Иран во втората половина на 2022 година, пишува Амнести, „Иранските власти исто така ја интензивираа употребата на смртната казна како оружје за потиснување на несогласувањето“.

Бројот на егзекуции во Иран во 2023 година е највисок од 2015 година и за 172 отсто поголем од 2021 година, кога Ебрахим Раиси стана претседател, а Голамхосеин Еџеи беше назначен за шеф на судството, се вели во извештајот на Амнести.

Иранската влада не објавува официјална статистика за бројот на егзекуции, а Амнести соработуваше со иранските групи за човекови права на документирање на случаите, користејќи отворени извори како државните медиуми и организациите за човекови права.

Најмалку 95 егзекуции беа пријавени во 2024 година до 20 март, соопшти групата за човекови права, додавајќи дека верува дека вистинскиот број на егзекуции во Иран е поголем.