Потребна ни е рамка за поддршка на Украина, која ќе биде попредвидлива и на земјата ќе и ја гарантира помошта која и е неопходна, изјави генералниот секретар на НАТО, Јенс Столтенберг пред почетокот на состанокот на министрите за надворешни работи на земјите членки на Алијансата во Брисел.
Во одговор на новинарско прашање во врска со информациите дека планира за предложи фонд од 100 милијарди евра за поддршка на Украина, Столтенберг изјави дека не може да даде детали за планот, нагласувајќи дека на земјата и е потребна посилна поддршка која нема да зависи од доброволните понуди на одделни држави, туку ќе се базира на долгорочната посветеност на НАТО.
„Потребно е да ја институционализираме таа поддршка во рамките на НАТО, за да ја направиме попредвидлива и поробусна. На Украина и треба долгорочна робусна и предвидлива поддршка и ние тоа ќе и го дадеме“, истакна Столтенберг.
Видете и ова: Зеленски побара Конгресот на САД да ја деблокира помошта за УкраинаСпоред него, таа поддршка е важна бидејќи со тоа се испраќа и јасна порака до Москва дека не може да победи на бојното поле.
„Ако сакаме војната да заврши, треба што поскоро да ја убедиме Москва дека не може да победи на бојното поле и во војната, туку треба да седне на преговарачка маса за договор прифаќајќи ја Украина како независна и суверена држава“, додаде Столтенберг.
Украина обнови голем дел од територијата што Русија првично ја зазеде по целосната инвазија на Кремљ на 24 февруари 2022 година. Сепак, толку очекуваната контраофанзива на Украина во 2023 година не постигна голем напредок, предизвикувајќи загриженост дека војната дошла во ќор-сокак.