Зеленски: Ако не реагираме сега, Путин ќе ги направи следните години катастрофални и за другите земји

Претседателот на Украина, Володимир Зеленски изјави денеска дека украинскиот отпор кон руската агресија со поддршка на сојузниците на Киев го запре уништувањето на светскиот поредок заснован на правила и дека „2024 година мора да биде момент за негова целосна обнова“.

Тој на панелот на конференцијата за безбедност во Минхен рече дека во моментов не постои некој за кого војната која е во тек во Европа не претставува закана.

„Ако не реагираме сега, Путин ќе успее да ги направи следните години катастрофални и за другите земји. Разузнавачката заедница е свесна за ова. Украина веќе ги разби митовите со кои Русија се обиде да ја замагли реалноста и во која, за жал, светот веруваше“, нагласи Зеленски.

Зеленски истакна дека е благодарен за безбедносниот договор со Германија кој беше потпишан вчера во Берлин, како и за оној што беше потпишан меѓу Украина и Франција во Париз и рече дека тоа е само „почеток на имплементацијата на договорите засновани на на безбедносната декларација на Г7“.

Видете и ова: Почнува годишната безбедносна конференција во Минхен

Украинскиот претседател рече дека недостигот на пристап на неговата земја до оружје го зајакнува рускиот претседател Владимир Путин.

„За жал, држењето на Украина во вештачки дефицит на вооружување, особено во отсуство на артилерија и способности со долг дострел, му овозможува на Путин да се прилагоди на моменталниот интензитет на војната“, рече тој во говорот на Конференцијата за безбедност во Минхен.

Зеленски го спомена градот Авдејевка од каде денеска се повлекоа украинските војници и рече дека одлуката е донесена за „да се спасат животите на Украинците“.

„Не прашувајте ја Украина кога ќе заврши војната. Запрашајте се зошто Путин сè уште е во состојба да ја продолжи?“, рече Зеленски.

Тој ги повтори обвинувањата на сметка на рускиот претседател Владимир Путин во врска со смртта на Алексеј Навални и изјави дека со, како што рече, „убиството“ на критичарот на Кремљ, Москва „испрати јасна порака до учесниците на конференцијата во Минхен“.

На 60-та Минхенска безбедносна конференција, на која се очекува да учествуваат околу 50 светски лидери. Како што јави ДПА, главните теми на агендата на безбедносната конференција се тековните конфликти во Украина и во Појасот Газа. Руските и иранските власти не се поканети на овогодишната Минхенска безбедносна конференција.