Иранската фудбалска федерација на 10 февруари објави дека побарала од Меѓународната фудбалска федерација ФИФА да ја суспендира израелската фудбалска федерација поради војната што земјата ја води во Појасот Газа, пренесе АФП.
Во соопштението објавено на веб-страницата на Иранскиот фудбалски сојуз, се наведува дека Иран побарал од ФИФА „целосно да ја суспендира“ израелската асоцијација „од сите активности поврзани со фудбалот“.
Во барањето, исто така, се бара ФИФА и нејзините конфедерации да преземат „итни и сериозни мерки“ за да се спречи „продолжувањето на израелските злосторства и да се обезбеди храна, вода за пиење, лекови и медицински материјали за невини луѓе и цивили“.
Војната во Газа започна на 7 октомври со ненадеен напад на Хамас врз Израел. Европската унија и Соединетите Американски Држави (САД) го прогласија Хамас за терористичка организација.
Во нападот на Хамас врз Израел загинаа 1 160 луѓе, главно цивили, покажуваат податоците на АФП врз основа на официјалните податоци на израелските власти.
Како одговор, Израел вети дека ќе го искорени Хамас. Тој започна воздушни напади и копнена офанзива врз Појасот Газа, во која, според Министерството за здравство контролирано од Хамас, повеќе од 27 000 луѓе, главно жени и деца, се убиени во Појасот.
Иран го поздрави нападот на Хамас на 7 октомври како „успешен“, но негираше каква било директна вмешаност.
Исламската Република не го признава Израел, својот заколнат непријател и забранува каков било контакт меѓу иранските и израелските спортисти.
Минатиот август, иранските власти доживотна забрана на кревачот на тегови Мостафи Раџаи, откако тој се ракуваше со израелски натпреварувач на настан во Полска, објавија тогаш државните медиуми.
Иранската федерација за кревање тегови го разреши Хамид Салехини, шефот на делегацијата на натпреварот. Во 2021 година, врховниот водач на Иран, ајатолахот Али Хамнеи ги повика спортистите „да не се ракуваат со претставник на (израелскиот) криминален режим ако сакаат да добијат медал“.
Група фудбалски асоцијации на Блискиот Исток, вклучувајќи ги Саудиска Арабија, Катар и Обединетите Арапски Емирати, исто така побараа од ФИФА да го суспендира Израел поради војната во Газа, објави Скај њуз на 8 февруари.
ФИФА се уште не се изјаснила за ова барање.