Министрите за одбрана на 27-те земји-членки на Европската Унија го отворија неформалниот состанок во Брисел на кој се разговараше за потребата од зајакнување на одбранбената индустрија на Унијата и воената поддршка за Украина, која со месеци се залага за воени набавки во војната против Русија.
Пред состанокот кој доаѓа еден ден пред клучниот самит на ЕУ на кој ќе се разговара за помошта на ЕУ за Украина, високиот претставник на Унијата за надворешни работи и безбедност, Жозеп Борел, рече дека на Киев му треба повеќе муниција за да ги надополни своите резерви по целосната руска инвазија која наближува до втората годишнина.
Руската артилерија со месеци ги погодува позициите на украинската војска и цивилните населби.
„Мораме да покажеме дека нашата јасна посветеност кон Украина останува и продолжува“, рече Борел, додавајќи дека е важно да се разјасни ситуацијата и „да се знае каде сме сега, каде ќе бидеме до март и до крајот на годината“.
Видете и ова: Украина ги поздрави конструктивните разговори со УнгаријаНапорите на Украина да се префрли од советско на западно тешко оружје, наиде на проблем со недостигот на муниција за опрема донирана од Западот.
За да се справи со недостигот на гранати, Брисел вети дека до пролет ќе испорача еден милион гранати, но досега само околу 300 000 се испорачани на украинската армија.
На почетокот на овој месец, претставници на 23 земји се собраа во Париз за да започнат т.н „Артилериска коалиција за Украина“, иницијатива предводена од САД и Франција под капата на таканаречената Контакт група Рамштајн, која се состои од повеќе од 50 сојузници на Украина.
По тој повод, Париз вети уште шест „Цезари“, водечки хаубици на француската артилерија што можат да фатат цели на оддалеченост од повеќе од 40 километри, велејќи дека ќе бидат испорачани во наредните недели.
Видете и ова: Пентагон нема повеќе пари за Украина, помош бара од сојузниците на САДПолитико во вторникот, цитирајќи повеќе извори, објави дека Украина може да добие нова американска прецизна бомба со долг дострел оваа недела. Сосема новото оружје, направено од Боинг, може да помине околу 145 километри и да носи бомба од 113 килограми, објави новинската агенција.
Администрацијата на Бајден го одобри трансферот на оружје во Украина минатата година, но прво требаше да се тестира во САД.
Во меѓувреме, украинската противвоздушна одбрана собори 14 од 20 беспилотни летала лансирани од руската армија врз цели во Украина, објави Киев. Беспилотните летала се соборени во регионите на Миколаев, Запорожје, Днепропетровск, Кировоград и Харкив, соопшти украинската војска.
Најмалку четири лица, тројца мажи и една жена, се ранети, а нападот со дрон ја оштети инфраструктурата во источниот регион на Харкив, изјави регионалниот гувернер Олех Синијехубов. Во вторникот, најмалку три лица загинаа во Украина во напади со руски беспилотни летала и ракети.