Европската унија (ЕУ) побара од косовските власти да ја објаснат одлуката за забрана на употребата на динарот на територијата на оваа земја.
Портпаролот на ЕУ, Петер Стано, во име на Унијата, побара од Приштина и Белград да ги решат отворените прашања во рамките на бриселскиот дијалог.
„Сè уште анализираме и бараме појаснувања за одлуката, причините, мотивот и можните импликации. Но, генерално, од Косово и од Србија се очекува да избегнат некоординирани акции кои не поддржуваат нормализација на односите и кои можат да имаат прилично негативно влијание врз стабилноста. на теренот“, рече Стано на 19 јануари.
На 17 јануари Централната банка на Косово (ЦБК) донесе уредба според која од 1 февруари единствена валута за извршување на готовина и платежни трансакции ќе биде еврото.
Видете и ова: Од први февруари, еврото единствена валута во КосовоВо тој указ се наведува дека е донесен во согласност со Уставот на Косово и законот на Централната банка на Косово (ЦКБ), и дека ЦБК е единствената „монетарна власт која може да одлучува за дозволените апоени на евро валута за оптек на територијата на Косово“.
Досега во српските области во Косово се користеше динарот, официјалната валута на Србија, а во остатокот од Косово официјална валута беше еврото.
Платите на вработените во српските институции се исплаќаат во динари, како и пензии во српскиот систем, детски додаток или социјална помош.
Исто така, во српските области, динарите се користат во трговските објекти, додека во општините со српско мнозинство на северот на Косово, цените се прикажани во динари.
Претставниците на косовската влада се на мислење дека декретот нема да влијае на односите со Србија.
Вицепремиерот на Косово, Бесник Бисљими, вели дека посебно значење на регулативата на Централната банка на Косово е одредувањето на валутата што е дозволено да се користи во сите банкарски и небанкарски трансакции и дека во случајот на Косово тоа е само еврото.
Сепак, Српска листа, најголемата партија на Србите во Косово, има поинакво мислење. Таа во изјавата оцени дека укинувањето на динарот значи „протерување на Србите без употреба на оружје“.
„Ако имате на ум дека десетици илјади Срби живеат и преживуваат на Косово и дека сите српски институции функционираат благодарение на финансиските придонеси на нашата држава Србија, тогаш можете да замислите што би се случило со нашиот народ ако динарот би бил укинат“, се наведува во соопштението.
Српската листа ја повика и меѓународната заедница да реагира.