Повикуваме на вакцинација затоа што вакцините спасуваат животи, апелираше денеска министерот за здравство Фатмир Меџити, одговарајќи на новинарско прашање, за тоа каква е состојбата со големата кашлица во државата и дали таа се должи на тоа што многу луѓе не ги вакцинираат своите деца.
„Знаете дека ги презедовме сите чекори, со сите европски институции соработуваме во тој правец и се одвива во добра насока. Значи, не можеме преку ноќ да го смениме менталниот склоп на граѓаните, но, ги повикувам сите, нашата иднина се нашите деца и ние ги повикуваме сите да се вакцинираат зошто тоа пред сè, ни ги заштитува животите и спасува. Затоа мора да сфатат и полека ќе сфатиме сите, дека вакцинирањето на нашата иднина е пред сè и тоа е иднината на нашата држава“, изјави министерот.
Видете и ова: Расте бројот на заболени од грип и ковид 19Инаку, голема кашлица, пертусис, е потврдена кај шестмесечно бебе од Скопје на Детската клиника „Козле“ во Скопје.
Директорот на Институтот за јавно здравје, Шабан Мемети вчера за МИА изјави дека три случаи на пертусис - голема кашлица, се евидентирани во 2023 година.
Во земјите од регионот е многу поголем бројот на заразени од голема кашлица. Експертите во Хрватска уште во декември предупредија дека бројот на заболени од голема кашлица во таа земја е најголем во изминатите 40 години. Тие, исто така, предупредија дека вакцинацијата против голема кашлица и други заразни болести и натаму е најефикасна заштита за новороденчињата и доенчињата, како и за постарите деца. Случаи на голема кашлица пријавија и Црна Гора и Србија.