Вести

САД очекуваат истрага за прославата на Денот на Република Српска

Мајкл Марфи, американски амбасадор во Босна и Херцеговина

Соединетите Држави очекуваат дека релевантните органи за спроведување на законот и правосудните институции ќе спроведат истрага за секој случај на прекршување на законот поврзан со одбележувањето на Денот на Република Српска на 9 јануари, соопшти американската амбасада во Босна и Херцеговина.

Нагласија дека Уставниот суд со повеќекратни пресуди јасно нагласил дека одбележувањето на овој ден е противуставно.

„Проблемот не лежи во празнувањето на празникот, туку во одлуката тој да се слави на деветти јануари.Поврзувањето на таа прослава со православен верски празник е спротивно на неколку одредби од Уставот на Босна и Херцеговина кои забрануваат дискриминација. Ова е прашање на закон, а не нечие мислење“, соопшти амбасадата на САД.

Видете и ова: Протест во Сараево поради неуставниот ден на Република Српска

Во соопштението се наведува дека Уставот на БиХ пропишува дека субјектите мора целосно да ги почитуваат одлуките на институциите на БиХ, вклучително и конечните и обврзувачки пресуди на Уставниот суд на БиХ.

„Според Кривичниот законик на Босна и Херцеговина, непочитувањето на пресудите на Уставниот суд на Босна и Херцеговина претставува кривично дело“, наведуваат од амбасадата на САД.

Тие додадоа дека САД претходно реагирале на антидејтонските активности и дека нема да се двоумат да го сторат тоа во иднина.

Властите во Република Српска и оваа година го организираат одбележувањето на Денот на РС на 9 јануари. Токму на тој ден во 1992 година, Собранието на српскиот народ во Босна и Херцеговина ја усвои Декларацијата за прогласување на Република Српска како независен ентитет во рамките на Босна и Херцеговина.

Претставниците на Бошњаците и Хрватите не учествуваа во изготвувањето на декларацијата. Овие две нации го гледаат 9 јануари како почеток на војната во Босна и Херцеговина и почеток на етничко чистење, воени злосторства и геноцид врз несрпското население.

Уставниот суд на Босна и Херцеговина во својата пресуда не го оспори правото да се слави денот на Република Српска, но утврди дека празникот не може да се слави на 9 јануари.