Во центарот на Белград денеска напладне (30 декември) се одржува нов протест на кој се бара поништување на изборите.
Лидерката на коалицијата „Србија против насилство“, Мариника Тепиќ, која 13 дена штрајкува со глад, ја поздрави толпата од бината, велејќи: „Овие избори мора да се поништат“.
Поради штрајкот со глад, нејзината здравствена состојба е нарушена, па за да се искачи на бината и помогнаа опозициските политичари Мирослав Алексиќ и Радомир Лазовиќ.
Организатор на постизборните протести во Србија е неформалната граѓанска иницијатива ПроГлас, покрената од истакнати јавни личности.
Протест во Белград, 30 декември 2023
Актерката Светлана Цеца Бојковиќ, една од иницијаторите на ПроГлас, на протестот во саботата прочита текст заснован на извештајот на невладината набљудувачка мисија ЦРТА за изборни нерегуларности. Како што рече, извештајот покажува масовно искривување на волјата на народот на изборите.
Радомир Лазовиќ, еден од лидерите на коалицијата Србија против насилство, рече дека бараат „поништување на овие украдени избори и нивно повторно одржување под фер услови, со организиран избирачки список, за да нема фантоми“.
„Земја која увезува гласачи и ги извезува своите деца нема иднина. Земја која апси студенти и ги пушта криминалците не е Србија во која сакаме да живееме“, рече Мирослав Алексиќ, исто така еден од претставниците на „Србија против насилството“.
Барањето на ПроГлас е во рок од шест месеци да се одржат парламентарни и локални избори во Србија, „по процесот на суштински промени во изборните услови“. Тие наведуваат дека е „изневерена“ изборната волја на граѓаните.
По изборите на 17 декември во Србија се одржаа серија протести поради наводите за изборна кражба од страна на владејачката Српска напредна партија (СНС), која прогласи победа на сите нивоа.
Најголемата опозициска коалиција „Србија против насилство“ ги обвинува за изборна кражба и бара повторување на изборите. Надлежните негираат.
Ден пред протестот, на 29 декември, Републичката изборна комисија (РИК) го отфрли приговорот на коалицијата „Србија против насилството“ за откажување на изборите.
Сомнеж за регуларноста на изборите изрази и Канцеларијата за демократски институции и човекови права на ОБСЕ (ОДИХР), која на 18 декември објави дека изборите биле одбележани со сериозни нерегуларности, злоупотреба на јавни средства, доминација на медиумите на претседателот Александар Вучиќ, негативна кампања и ширење на страв.