Државниот секретар на Соединетите Американски Држави (САД), Ентони Блинкен на 20 декември изрази внимателна надеж дека Соединетите Држави ќе можат да ја поддржат новата резолуција на Советот за безбедност на ОН за Газа, со клучна точка за пристапот до помош.
Соединетите Држави, критичниот сојузник на Израел, ставија вето на две резолуции во Советот за безбедност, бидејќи ги отфрлија повиците до Израел да ја прекине својата воена кампања започната како одговор на нападот на Хамас на 7 октомври.
Блинкен, обраќајќи им се на новинарите во Вашингтон, рече дека Соединетите Држави се ангажираат „со многу добра волја“ со другите земји, по бесот во арапскиот свет поради претходните вето.
„Интензивно работевме на ова. Последниве неколку дена зборував на телефони за ова. Се надевам дека ќе стигнеме до добро место“, рече Блинкен.
Последната верзија на нацрт-резолуцијата, предводена од Обединетите Арапски Емирати, престанува да го користи зборот прекин на огнот и наместо тоа се фокусира на хуманитарен пристап до опколениот Појас Газа.
Видете и ова: Советот за безбедност ќе гласа за прекин на огнот во ГазаБлинкен посочи дека хуманитарното прашање е клучната точка, при што Израел инсистира на целосна контрола на залихите што влегуваат на блокираната палестинска територија.
„Целта на резолуцијата, како што е наведено од земјите што ја предложија, е да се олесни и помогне да се прошири хуманитарната помош што доаѓа во Газа. И ние целосно го поддржуваме тоа“, рече Блинкен.
„Сакаме да се увериме дека резолуцијата во она на што повикува и го бара всушност ги унапредува тие напори и не прави ништо што всушност би можело да и наштети на испораката на хуманитарна помош и да ја направи посложена“, рече тој.
Блинкен тврдеше дека Соединетите Држави, кои вршеа притисок зад сцената, успеаја во последните денови да постигнат напредок, вклучително и преку пристигнувањето на комерцијални камиони и отворањето на вториот премин во Газа.