Украинската војска соопшти дека нејзините единици за противвоздушна одбрана собориле 15 од 18-те беспилотни летала од иранско производство, лансирани од Русија на украинска територија рано на 7 декември. Војската во пораката на Телеграм соопшти дека нападот, во кој биле вклучени беспилотни летала Шахед-136/131, бил лансиран од Кејп Чауда во регионот на Крим окупиран од Москва.
Нападот главно бил насочен кон централниот регион Хмелницки и регионот Одеса на југ. Одеса е главното украинско пристаниште на Црното Море и нејзините капацитети за жито често се цел на руски напади.
Интензивирањето на руските напади врз енергетските капацитети во Украина ги влошува хуманитарните услови низ земјата зафатена од војна, каде веќе пристигнаа обилни снегови и ниски температури, изјавија претставници на ОН.
Вашиот пребарувач не подржува HTML5
Украински деца ранети со забрането оружје
Помошникот генерален секретар Мирослав Јенча пред Советот за безбедност на ОН на 6 декември изјави дека континуираните напади на Русија врз критичната цивилна инфраструктура во Украина резултирале со цивилни жртви.
„Сите напади врз цивили и цивилна инфраструктура мора веднаш да престанат. Тие се забранети со меѓународното хуманитарно право и едноставно се неприфатливи“, вели тој.
Јенча, исто така, ги истакна ризиците за сите четири украински нуклеарни централи.
Во меѓувреме, главниот советник на Володимир Зеленски вели дека тој имал телефонски разговор со унгарскиот министер за надворешни работи Петер Сијарто за потенцијална средба меѓу украинскиот претседател и унгарскиот премиер Виктор Орбан.
Андриј Јермак разговараше со Сијарто за време на неговата посета на Соединетите Држави, објави прес-службата на Зеленски.
Јермак и Сијарто „се договорија да работат на утврдување соодветен датум за таков состанок“, се вели во него. Сијарто во изјавата рече дека Будимпешта е отворена за таков состанок „но само ако има смисла“.
Орбан се спротивстави на предлогот на Европската Унија за почеток на преговори за членство со Украина.