Американскиот Конгрес треба брзо да дејствува за да обезбеди помош за Украина пред крајот на месецот за да се избегне прекин во поддршката што ја даваат Соединетите држави, изјави портпаролот на Белата куќа за национална безбедност Џон Кирби.
„Потребна ни е таа помош веднаш за да можеме да им пружиме помош на непрекинат начин“, рече Кирби на 1 декември на брифинг со новинарите.
„Постојано ѝ даваме на Украина навистина невидено ниво на безбедносна поддршка повеќе од една и пол година. И успеавме да го обезбедиме тоа со неверојатна брзина“, рече Кирби.
Досегашната помош од САД изнесуваше 40 милијарди долари, а Кирби рече дека Вашингтон планира да испрати повеќе системи за оружје, но за ова Конгресот треба да донесе пакет со дополнителни средства.
Претседателот Џо Бајден минатиот месец поднесе барање до Конгресот за повеќе од 105 милијарди долари помош за одбраната, што вклучуваше 61,4 милијарди долари помош за Украина и 14,3 милијарди долари помош за Израел, но мерката останува блокирана.