Шефовите на дипломатиите на земјите од Групата седум водечки индустриски демократии објавија заеднички став за војната меѓу Израел и Хамас по интензивните состаноци во Токио.
Во заедничката декларација се осудува Хамас, се поддржува го правото на Израел на самоодбрана и се повикува на „хуманитарни паузи“ за да се забрза помошта за очајните палестински цивили во појасот Газа.
Американскиот државен секретар Антони Блинкен и министрите за надворешни работи на Велика Британија, Канада, Франција, Германија, Јапонија и Италија „го нагласуваат правото на Израел да се брани себеси и својот народ во согласност со меѓународното право бидејќи се обидува да спречи повторување“ на нападите на Хамас врз Израел од 7 октомври.
„ Ја нагласуваме потребата од итна акција за решавање на влошената хуманитарна криза во Газа. Сите страни мора да дозволат непречена хуманитарна поддршка за цивилите, вклучувајќи храна, вода, медицинска нега, гориво и засолниште, како и пристап за хуманитарните работници“, се вели во документот.
Во декларацијата, исто така, „недвосмислено“ се осудуваат „терористичките напади на Хамас и другите низ Израел кои почнаа на 7 октомври 2023 година, како и тековните ракетни напади против Израел“.
Во изјавата се повикува Иран „да се воздржи од обезбедување поддршка за Хамас и преземање понатамошни активности кои го дестабилизираат Блискиот Исток, вклучително и поддршка за либанскиот Хезболах и другите недржавни актери и да го искористи своето влијание врз тие групи за да ги деескалира регионалните тензии“.
Во документот исто така се осудува „зголемувањето на насилството од доселениците екстремисти извршено врз Палестинците“, за кое министрите велат дека е „неприфатливо, ја поткопува безбедноста на Западниот Брег и ги загрозува изгледите за траен мир“.