Корисниците на Фејсбук и Инстаграм во Европа добиваат опција да плаќаат за верзии без реклами на платформите на социјалните медиуми, како начин на усогласување со строгите правила за приватност на податоците, објави Мета на 30-ти октомври.
Почнувајќи од ноември, корисниците на персонални компјутери можат да плаќаат околу 10 евра месечно, додека корисниците на iOS или Android ќе плаќаат околу 13 евра. Повисоките цени ги одразуваат провизиите што ги наплаќаат продавниците за апликации Apple и Google за плаќања во апликациите, соопшти компанијата.
Надоместокот ќе ги покрие сите поврзани сметки на Facebook и Instagram до март, кога Мета ќе почне да наплаќа по 6 евра за секоја дополнителна сметка.
Видете и ова: ЕУ проверува дали Мета и ТикТок спречуваат дезинформации за Израел и ХамасАмериканскиот технолошки гигант воведува опција за претплата откако највисокиот суд на Европската унија пресуди дека според строгите правила на ЕУ за приватност на податоците, Мета мора прво да добие согласност пред да им сервира реклами на корисниците. Пресудата ја загрозува способноста на компанијата да заработува пари со приспособување на реклами на индивидуални корисници врз основа на нивните онлајн интереси и дигитална активност.
Компанијата рече дека иако верува дека „рекламите го поддржуваат интернетот“, таа го почитува „духот и целта на овие европски регулативи кои се развиваат“ и е посветена да ги почитува.
Платената опција „ги балансира барањата на европските регулатори, истовремено давајќи им на клиентите избор и дозволувајќи му на Мета да продолжи да обезбедува услуги за клиентите“, рече Мета.
Корисниците на возраст од 18 и повеќе години во 27-те земји-членки на ЕУ плус Швајцарија, Норвешка, Исланд и Лихтенштајн сè уште ќе имаат избор да продолжат да користат Фејсбук или Инстаграм со реклами.
Мета рече дека размислува како да им „обезбеди на тинејџерите корисно и одговорно искуство за рекламирање“ во светло на европската пресуда за приватност.