Убиена претседателката на синагогата во Детроит, нема докази дека е поради антисемитизам

Полицијата не нашла докази кои покажуваат дека антисемитизм е мотивот за убиството на претседателката на локалната синагога во Детроит, во американската држава Мичиген.

Шефот на полицијата во Детроит, Џејмс Вајт, објави дека „не се пронајдени докази кои покажуваат дека злосторството било мотивирано од антисемитизам“. Полицијата ги истражува мотивите на злосторството и ја повикува јавноста да не избрзува со заклучоци.

Саманта Вол, која ја водеше синагогата Исак Агреј во центарот на градот и беше поранешен помошник на демократската конгресменка Елис Слоткин и вработена во кампањата на јавниот обвинител Дејна Несел, е запаметена како водач на заедницата кој работеше на изградба на мостови.

„Сем беше најљубезната личност што ја познавав“, објави Несел на социјалната мрежа X.

„Таа беше водена од нејзината искрена љубов кон нејзината заедница, нејзината држава и нејзината земја. Сем навистина ја искористи својата вера и активизам за да создаде подобро место за сите“, додаде Несел.

Видете и ова: Новинарки во Иран осудени на затвор откако известуваа за Махса Амини

Погребот се одржа во неделата попладне во предградие на Детроит.

Американското Федерално истражно биро (ФБИ) учествува во истрагата, но не соопшти дали е идентификуван осомничениот.

Властите соопштија дека телото било пронајдено во нејзиниот дом во саботата наутро, откако некој повикал полиција за да ги извести за лице кое лежело на земја и не реагирало.

„Додека беа на местото на злосторството, полицајците забележаа трага од крв што ги одведе полицајците во станот на жртвата, каде што се верува дека се случило злосторството“, изјави полицискиот капетан Ден Донаковски.

Вол (40) ја води синагогата Исак Агри во центарот на градот од 2022 година. Верските групи во областа Детроит ја пофалија нејзината меѓуверска работа.

Советот за американско-исламски односи во Мичиген ја нарече нејзината смрт „трагична загуба“, истакнувајќи ја меѓуверската работа со нејзиното собрание. Тоа вклучуваше молитвено бдение за жртвите од смртоносниот напад на синагога во Пенсилванија во 2018 година.