Голем број луѓе загинаа во напад на конвој во Газа

Голем број луѓе загинаа во воздушен напад врз конвој возила што беше евакуиран од северот на Газа кон југот на областа, пренесоа светските агенции.

Би-Би-Си (BBC) наведува дека на видеото се гледаат најмалку 12 мртви луѓе, главно жени и деца, од кои некои се чини дека се на возраст од две до пет години.

Британскиот јавен сервис јавува дека ударот се случил на улицата Салах ал-Дин, веројатно околу 17:30 часот по локално време, дека повеќето од телата биле пронајдени на задниот дел од камион со рамно лежиште, додека други лежеле на патот.

Видете и ова: Медицинската помош за Газа слета во Египет

Палестина го обвинува Израел

Палестинското Министерство за здравство соопшти дека 70 луѓе биле убиени на самото место и го обвини Израел за нападот. Израелските одбранбени сили (ИДФ) соопштија дека го истражуваат инцидентот и рекоа дека Хамас се обидува да спречи цивили да го напуштат северот.

Толпата на патот наменет за евакуација на цивили е присутна уште од моментот кога Израел го предупреди населението да се засолни пред можна израелска копнена офанзива на појасот Газа.

Израелската војска соопшти дека постапува во согласност со меѓународното право, по обвинувањата дека евакуацијата на луѓето од северна Газа претставува воено злосторство.

Видете и ова: Израел даде рок од шест часа за безбедно преминување на југот на Газа

„Ние не ставаме луѓе во камиони. Им велиме да се преселат на југ. Хамас може да ги премести ако се грижат за нив, тоа е нивна одговорност“, изјави за Би-Би-Си потполковник Ричард Хехт, портпарол на израелските одбранбени сили (ИДФ).

Британскиот јавен сервис објави дека израелската армија предложила цивилите кои бегаат од Газа да останат кај роднините или да користат шатори за да најдат место за престој.