Амбасадорот на САД во Србија: Белград и Приштина ќе мора да постигнат политичко решение

Амбасадорот на САД во Србија, Кристофер Хил, на 12 октомври изјави дека Србија и Косово на крајот ќе треба да дојдат до политичко решение, за кого и да биде утврдено дека е одговорен за настаните во Бањска на северот на Косово.

„Сега имаме проблем што мора да се реши. Кој и да е одговорен за тоа, ќе мора да имаме политичко решение, ќе треба да седнеме и да сфатиме што е фер“, рече Хил, говорејќи на белградската безбедносна конференција (BSC).

Тој изјави дека ова решение подразбира „некаков статус“ за Србите на Косово, а од друга страна „поголема интернационализација“ за Косово.

Хил рече дека „би сакал Србија да разбере и признае дека Косово е независна држава“, но наведе дека проблемот е „покомплексен од тоа“.

„Треба да ги охрабриме двете страни да се слушаат една со друга“, рече Хил.

Видете и ова: Курти: Се зголемува ризикот од повторени напади од „српските криминални структури“

Тој додаде дека првиот чекор во решавањето на актуелната криза е разбирање на она што се случило.

„Прво, треба да разбереме што се случи и да ги повикаме одговорните, а потоа да се погрижиме тоа да не се повтори“, рече Хил.

Во нападот на косовската полиција на 24 септември во градот Бањска на северот на Косово, загина полицаецот Африм Буњаку, а неколку други беа повредени. Во нападот на полицијата убиени се тројца напаѓачи, а во месноста Бањска е пронајден голем арсенал оружје.

Владата на Косово ја обвинува Србија за овој инцидент, додека официјален Белград негира вмешаност.

Видете и ова: Вучиќ: Следува обвинение против Милан Радоичиќ

Одговорноста за организацијата на таа група јавно ја презеде Милан Радоичиќ, тогашен потпретседател на партијата на косовските Срби, Српска листа, која има поддршка од официјален Белград и од владејачката Српска напредна партија (СНС), чиј претседател беше Вучиќ до неодамна.

Радоичиќ потоа поднесе оставка од партиската функција.

Косовските власти за овој инцидент ја обвинуваат Србија, а Белград негира. Институциите на Косово и Србија спроведуваат одвоени истраги.

Европската унија и западните земји остро го осудија нападот врз косовската полиција во Бањска и побараа напаѓачите да бидат пронајдени и изведени пред лицето на правдата.