Бугарската влада на 13 септември соопшти дека се залага за укинување на забраната за увоз на украинско жито во замена за дополнителна компензација за нејзините земјоделци. Унгарија, Полска, Романија и Словачка инсистираат актуелната забрана да биде продолжена од Европската комисија и се закануваат еднострано да преземат мерки доколку не се исполнат нивните барања.
Бугарија и четирите други регионални земји се обидоа да ги заштитат сопствените земјоделски сектори од поплавата на производи од Украина во изминатите 18 месеци, обвинувајќи го увозот за падот на цените на локалните пазари.
Војната на Русија против Киев и прекинот на украинскиот извоз на жито преку Црното Море резултираа со тоа што Европската унија стана главна транзитна рута и извозна дестинација за украинското жито.
Во мај, Европската комисија се согласи да им дозволи на Полска, Бугарија, Унгарија, Романија и Словачка да ја забранат домашната продажба на украинска пченица, пченка, семе од репка и семки од сончоглед, истовремено дозволувајќи транзит на такви товари за извоз на друго место.
Ограничувањата треба да истечат на 15 септември, но Унгарија и Полска побараа од Комисијата да ги продолжи.
Бугарија се приклучи во барањето забрана за украинските производи, но последователната промена на владата резултираше со промена на таа позиција. Но, во Бугарија, гледиштето не е едногласно. Министерот за земјоделство Кирил Ватев на 12 септември рече дека неговата канцеларија ќе се обиде да ја продолжи забраната, предупредувајќи на „тешки протести“ доколку таа биде укината.
Бугарската парламентарна комисија на 12 септември усвои предлог-одлука Софија да ја укине забраната по 15 септември. Конечната одлука што се очекува да биде одобрение треба да биде донесена на пленарната седница на парламентот, најверојатно на 14 септември.
Бугарскиот премиер Николај Денков на 13 септември рече дека неговата влада го поддржува откажувањето од забраната бидејќи тоа ќе ги намали цените на основната храна.
„Увозот ќе ја стимулира конкуренцијата на пазарот. Тоа пак ќе доведе до намалување на цените на основните прехранбени производи и инфлација, што е еден од главните приоритети на кабинетот“, рече Денков.
Видете и ова: Г20 ги повика Русија и Украина веднаш да обезбедат испорака на житоТој додаде дека неговата влада ќе побара обновување на увозот во замена за дополнителна компензација за бугарските земјоделци што ќе ја обезбеди Европската комисија.
Доколку Софија ја укине својата забрана, тоа би било спротивно на политиките на некои од нејзините регионални колеги.
Полска најави дека еднострано ќе ја продолжи забраната доколку Европската комисија не ја продолжи.
Полска е главен снабдувач на воена и хуманитарна помош за Украина и е домаќин на околу 1 милион украински бегалци. Но, прашањето за житото е особено чувствително за владата во Варшава бидејќи земјата одржува избори следниот месец.
Украина предупреди дека може да побара меѓународна арбитража поради ограничувањата на нејзиниот извоз на жито, откако Полска рече дека ќе продолжи да го блокира домашниот увоз на украинско жито.