Припадници на ерменската и американската армија следната недела ќе одржат заеднички воени вежби во Ерменија, соопшти денеска ерменското Министерство за одбрана.
„Како дел од подготовките за учество во меѓународните мировни мисии, од 11 до 20 септември во Ерменија ќе се одржи заедничка вежба меѓу Ерменија и САД „Орел партнер 2023“, се наведува во соопштението.
Министерството посочува дека целта на вежбата е зголемување на интероперабилноста на единицата што учествува во меѓународни мировни мисии, размена на најдобри практики во контролата и тактичката комуникација, како и зголемување на подготвеноста на ерменската единица за планираната евалуација од програмата на НАТО „Партнерство за мир“.
Не е прецизирано колку американски и ерменски персонал ќе бидат вклучени, пренесува Ројтерс.
Русија има воена база во Ерменија и се гледа себеси како водечка сила во регионот на Јужен Кавказ, кој беше дел од Советскиот Сојуз до 1991 година.
Таа одржува мировни сили во регионот за поддршка на договорот со кој заврши војната меѓу Ерменија и Азербејџан за регионот Нагорно-Карабах во 2020 година, втора по распадот на Советскиот Сојуз.
Видете и ова: Пашинјан - Потпирањето за безбедност само на Русија беше „стратешка грешка“Ерменскиот премиер Никол Пашинјан во интервју за италијански весник изјави дека Русија не успеала да ја заштити Ерменија од, како што рече, континуираната агресија од Азербејџан.
Тој посочи дека руската војна во Украина покажува дека таа не е во состојба да ги исполни сите безбедносни потреби на Ерменија.
Портпаролот на Кремљ, Дмитриј Песков, изјави дека не се согласува со забелешките на Пашинјан.
Русија е апсолутно интегрален дел од овој регион, рече тој.
„Русија игра доследна, многу важна улога во стабилизирањето на ситуацијата во овој регион и ние ќе продолжиме да ја играме таа улога“, рече Песков.
Нагорно-Карабах, кој со децении е извор на тензии меѓу Ереван и Баку, е меѓународно признат како дел од Азербејџан, но неговите 120 000 жители се претежно етнички Ерменци. Се отцепи од Баку во војна во раните 1990-ти, иако Азербејџан ја врати контролата врз некои области во тешките борби во 2020-тите. Конфликтот заврши со мировен договор со кој се призна победата на азербејџанските сили. Договорот е постигнат со помош на Русија.