Македонската машка одбојкарска репрезентација е пред речиси сигурен пласман во осминафиналето на Европското првенство, откако вечерва ја забележа и втората победа, совладувајќи ја Црна Гора со 3-0 во сетови (25-22, 25-18, 25-20).
Натпреварот против Црна Гора беше во рамки на второто коло во групата Ц која се игра во Скопје.
Одбојкарите во првиот натпревар ја победија Данска со (3-1) во сетови, а со втората победа вечерва во СЦ „Борис Трајковски“ ја отворија вратата за пласман меѓу 16. најдобри европски селекции и место во осминафиналето кое ќе се игра во Бари.
Претходно денеска во рамки на групата Ц, Холандија ја совлада Чешка со максимални 3-0.
Македонските одбојкари утре од 20 часот во СЦ „Борис Трајковски“ ќе играат против Полска, а во истиот термин во вторник противник ќе им биде Холандија, додека во завршното коло, в среда, ќе играат против Чешка.
Македонската одбојкарска репрезентација со шест бодови и сет – количник е второпласирана, а пласман во нокаут фазата ќе обезбедат четирите првопласирани репрезентации во групата Ц.