Ветувања и војувања

БИХ - Министерот за внатрешни работи на кантонот Тузла (МУП ТК) Хајрудин Механовиќ потврди за Радио Слободна Европа (РСЕ) дека маж ја убил својата невенчана сопруга во семејната куќа недалеку од Живинице, на североистокот на Босна и Херцеговина. После тоа извршил самоубиство. Ова е второ убиство во изминатите десет дена во Босна и Херцеговина во кое маж ја убил својата невенчана сопруга.

ГРЦИЈА - Лидерите на неколку балкански земји учествуваат на денешната неформална вечера во Атина со гости од Европската Унија по повод 20-годишнината од усвојувањето на солунската Декларација. Грчкиот премиер Киријакос Мицотакис приредува неформална вечера за највисоките функционери од девет балкански земји, како и за претседателката на Европската комисија Урсула фон дер Лајен и шефот на Европскиот совет, Шарл Мишел. Кабинетот на Мицотакис соопшти дека на вечерата ќе присуствува и украинскиот претседател Володимир Зеленски, по разговорите со грчкиот премиер.

МАКЕДОНИЈА - Улогата на матичните лекари да се засили, да се намалат административните процедури за хронична терапија, но и дел од пациентите да добијат можност за преглед кај матичниот лекар ако претходно електронски си закажат термин. Министерот за здравство, Фатмир Меџити најави реформи во примарното здравство за кои вели дека веќе се почнати.

МАКЕДОНИЈА - Да нема дискриминација по однос на законските одредби за покачување на платите кога се работи за функционери во споредба со работниците, бара Сојузот на синдикатите на Македонија. Од таму поднесоа предлог до Собранието за намалување на платите на функционерите за 78 отсто. Со него бараат итни измени на член 11 од Законот за плата и другите надоместоци на пратениците во Собранието и другите избрани и именувани лица во државата.

МАКЕДОНИЈА - Нема информации кој е човекот кој вееше знаме со карта на голема Албанија во Тетово при престојот на албанскиот премиер Албин Курти на 12 август. Министерот за внатрешни работи Оливер Спасовски денеска изјави дека и понатаму се утврдува идентитетот и дека се прибираат информации по објавата на фотографијата од лицето.

СЕВЕРНА КОРЕЈА - Националната авиокомпанија на Северна Кореја требаше да го изврши својот прв комерцијален лет по повеќе од три години во понеделник, 21 август, но тој беше откажан во последен момент.

САД - Земјотрес со јачина од 5,1 степени според Рихтеровата скала ја погоди областа јужна Калифорнија во неделата попладне по локално време, која исто така беше погодена од тропската бура Хилари.

САД - Поранешниот американски претседател Доналд Трамп рече дека ќе ги прескокне претстојните прелиминарни дебати на републиканците, наведувајќи го неговото големо водство во анкетите како доказ дека тој веќе бил познат и им се допаѓа на гласачите пред изборите во 2024 година.

ДАНСКА / ХОЛАНДИЈА - Холандија и Данска соопштија дека ќе и дадат борбени авиони Ф-16 на Украина откако ќе се исполнат одредени „услови“. Ова е долгоочекуван чекор што ќе му помогне на Киев да ја пополни клучната дупка во своите вооружени сили.

МАКЕДОНИЈА - Дијабетичарите следната недела ќе може да ги набават лентите за мерење шеќер во крвта, соопшти министерот за здравство Фатмир Меџити на официјалниот Фејсбук профил. Тој вели дека конечно е надминат наследениот проблем со набавката на ленти за мерење шеќер.