МВР се уште трага по човекот кој вееше знаме на т.н. Голема Албанија во Тетово

Нема информации кој е човекот кој вееше знаме со карта на голема Албанија во Тетово при престојот на албанскиот премиер Албин Курти на 12 август. Министерот за внатрешни работи Оливер Спасовски денеска изјави дека и понатаму се утврдува идентитетот и дека се прибираат информации по објавата на фотографијата од лицето.

Тој повтори дека не е вработен во Министерството за внатрешни работи истакнувајќи дека ќе се утврди идентититетот и оти ќе има правда дури и во случај да е странски државјанин.

„Не велиме и не демантирам, едноставно човекот што го носеше знамето не е вработен во МВР. А кого би знаеле ако не ги знаеме вработените во МВР? Според тоа, знаејќи дека инспекторот или лицето кое се посочува не е тоа лице ние затоа објавивме и фотографија, јавна објава, за да видиме во однос на препознавањето на ова лице и понатаму утврдуваме кој би бил идентитетот на ова лице. Имаше лица кои и не се од Република Северна Македонија дојдени од надвор на тие средби“, изјави Спасовски.

Видете и ова: Националистичка иконографија во трка по гласови

За време посетата на косовскиот премиер Албин Курти, не беше интонирана државната химна и не беше поставено ниту државното знаме. Настанот предизвика бројни реакции во јавноста. Реагираа претседателот на државата Стево Пендаровски, ВМРО-ДПМНЕ и другите опозициски партии, владејачките партии но и Владата и премиерот Димитар Ковачевски.

Кабинетот на Ковачевски по бројните реакции истакна дека посетата на Курти била приватна, додека за истакнувањето знамиња на т.н. Голема Албанија наведе дека е спротивно на протоколите и законите за организирање настани во присуство на државници од странски земји.

Видете и ова: Османи- Реакциите во Скопје за посетата на Курти се последица на недоразбирање кое бргу ќе се надмине

По реакциите, Министерството за внатрешни работи (МВР) поднесе прекршочни пријави против општините Тетово и Чаир и нивните градоначалници Биљал Касами и Висар Ганиу. Според министерот за внатрешни Спасовски, правда ќе има а Ако лицето е странски државјанин, како што истакна, ќе се искористат сите правни механизни да биде изведено пред правосудните органи.