ФК Вардар не е на продажба, а понудата претставува провокација. Ова го порача еден од водачите на навивачката група Комити, Милорад Миленковски, откако вчера на Фејсбук страницата на фудбалскиот клуб се објави информација дека добиле понуда за купување на црвено - црните.
Пораката е испратена од претседателот на бугарската Фондацијата „Македонија“, Виктор Стојанов, кој како што пишува, ги контактира во име на компанија за изградба на спортски објекти во Бугарија и самата компанија.
„Би сакале да разговараме со раководството на клубот, за купување на 51 насто од акциите. Веднаш можеме да обезбедиме сума од 300 000 евра, со која Вардар може да започне во прва лига, како и да потпишам договор за 500.000 евра, буџет за следната година“, пишува во пораката која ја објавија Комити, а била испратена од Стојанов.
Стојанов ја потврди комуникацијата на социјалната мрежа, дополнувајќи дека во ФК Вардар имало интерес и договор за средба во Скопје, но, по објавениот став, договорот пропаднал.
Во разговор на Радио Слободна Европа, еден од водачите на Комити, Милорад Миленковски, вели дека ова е втора провокација од Фондацијата „Македонија“.
„По првата провокација на Фондацијата користејќи го нашето лого, пуштија Фејсбук порака на нашата страница со намера за купување на ФК Вардар. Ние не одговоривме на тоа, ги игнориравме тие провокации, ние си имаме сериозни и реални проблеми во клубот. Ја искористивме таа порака за да се мобилизира општеството внатре во Македонија, да покажеме дека тоа го прават со цел остварување на други цели. Тука отворено сакаме да ги прашање градот Скопје, државата, општините, а најмногу народот - што чекате? Што треба да ве мобилизира да купите сезонски билет за помош на Вардар“, прашува Миленковски.
Вашиот пребарувач не подржува HTML5
Миленковски: Вардар не е на продажба
На прашањето на РСЕ, дали ова всушност претставува официјална понуда до клубот, Миленковски вели дека биле контактирани од општински фудбалски сојуз во Македонија, кои се јавиле во ФК Вардар, бидејќи имало интерес од бугарска компанија за купување на клубот.
„Ние велиме нормално секако, ние сме отворени за разговори, бидејќи Вардар е професионален клуб и не може туку така да отфрла какви било понуди. Нека се јават да видиме што сакаат. Се јавија, побараа време до денеска (вторник) да се јават за закажување евентуален состанок за четрток. Но, во одговорот што тој дотичен господин го објавува јавно до Вардар и комити се гледа дека и таа понуда била со цел да се создаде нова провокација, бидејќи се работи за истиот човек“, вели Миленковски.
Претходно, бугарската Фондација најави дека ќе регистрираат фудбалски клуб наречен ФК Вардар – бугарски во земјава. Логото на клубот го презентираа исто како логото на Вардар, но, со бугарско знаме. Според тогашните најави, почнале да собираат пари за купување на некој актуелен клуб од Македонија од третата или четвртата лига.
Доколку евентуално клубот се регистрира со веќе презентираното лого, вели Миленковски, ќе претставува злоупотреба и ќе поднесат прекршочна и кривична пријава, бидејќи логото на Вардар е заштитено во Заводот за заштита на индустриска сопственост.