На меѓународниот аеродром „Винченцо Белини“ во градот Катанија на Сицилија ноќеска избувнал пожар, што набрзо бил изгаснат.
Сите летови од аеродромот се откажани до 19 јули до 14 часот, соопшти компанијата што управува со тој аеродром SAC.
Пожарот, што избувнал синоќа во 23 часот и 29 минути и веднаш бил пријавен кај пожарникарите, за кусо време бил изгаснат, а патниците биле евакуирани од аеродромската зграда полна со чад.
Новинската агенција Анса објави дека по избувнувањето на пожарот, во долниот дел од зградата се појавил густ чад, поради што луѓето панично бегале од аеродромот. Притоа имало и патничко стампедо, но нема посериозни повредени.
Аеродромот Катанија редовно го користат туристи кои одат на места како што се Етна и Таормина, која е оддалечена околу 70 километри и Сиракуза, со грчкиот театар.
Пожарот се појвил на долниот кат на аеродромот, додава РАИ, за причината за неговото појавување уште не е утврдена.