Египет и Турција првпат по десет години именуваа амбасадори во Каиро и Анкара, со цел да ги обноват нормалните дипломатски односи, соопштија министерствата за надворешни работи на двете земји.
Консултациите на високи претставници на министерствата во Анкара и Каиро започнаа во 2021 година, по желбата на Турција да ги подобри односите со Египет, Обединетите Арапски Емирати, Израел и Саудиска Арабија.
Нормализацијата на односите беше забрзана откако претседателот на Египет Абдел Фатах ел Сиси и претседателот на Турција Реџеп Таип Ердоган се сретнаа во Доха за време на Светското првенство во фудбал што во декември се одржа во Катар.
Сиси и Ердоган во мај се договорија да испратат амбасадори во Каиро и Анкара.
Египетското Министерство за надворешни работи соопшти дека египетскиот амбасадор во Анкара ќе биде Амр Елхамами, а турскиот амбасадор во Каиро Салих Мутлу Сен.
Двете земји меѓусебно немаат праќано амбасадори од 2013 година, откако властите во Каиро го протераа турскиот амбасадор и ја обвинија Анкара дека поддржува организација која сака да му се закани на Египет.