Европската комисија на 20 јуни предложи буџетот на Европската Унија да се ревидира за да се задоволат потребите на Украина, за управување со миграцијата и да се одржи конкурентноста на економијата. Планирано е во следните четири години за Украина да бидат наменети 50 милијарди евра, најави претседателката на Европската комисија, Урсула фон дер Лајен.
Фон дер Лајен објасни дека средствата доделени на Киев ќе бидат обезбедени неповратно и во форма на заеми. Таа истакна дека овие трошоци не биле вклучени во буџетот при неговото изготвување.
„Далеку сме од условите под кои беше договорен повеќегодишниот буџет на ЕУ до 2027 година“, рече претседателката на ЕК.
Според неа, Комисијата веќе морала да пренасочи суми од кохезивните фондови за да ги обезбеди како помош за земјите што ги примиле украинските бегалци.
„Досега Украина има добиено 30 милијарди евра помош“, додаде Фон дер Лајен.
Видете и ова: ЕУ ја забрзува испораката на оружје за УкраинаТаа повика и да се обезбедат 15 милијарди евра за заштита на надворешните граници на ЕУ и за земјите од кои доаѓаат мигрантите. Фон дер Лајен рече дека пакетот помош ќе обезбеди перспектива и сигурност на украинските партнери на Унијата.
Најавата доаѓа пред меѓународната конференција во Лондон оваа недела, чија цел е да се соберат дополнителни средства за обнова на земјата.