Најголемите воздушни маневри во историјата на НАТО започнуваат денеска во германскиот воздушен простор со двонеделна вежба во која учествуваат околу 10.000 војници и 250 авиони од 25 земји, јави ДПА.
Предводена од германскиот Бундесвер, вежбата ќе трае до 23 јуни и има за цел да вежба одбивање на фиктивен напад на агресор од исток.
„Тоа ќе биде демонстрација на сила со цел да се покаже единството на сојузниците и да се импресионираат потенцијалните противници, како што е Русија“, изјавија минатата недела германски и американски претставници, при најавувањето на вежбата.
Вашингтон испраќа 2 000 припадници на американската Национална гарда и околу 100 авиони да учествуваат на оваа обука.
„Ова е вежба која ќе биде апсолутно импресивна за секој што ја гледа, а ние не присилуваме никого да ја гледа“, изјави претходно американската амбасадорка во Германија Ејми Гутман.
Видете и ова: Финска ја заврши првата вежба на НАТО како членка на АлијансатаТаа појасни дека вежбата без сомнение ќе ја демонстрира „агилноста и брзината“ на сојузничките сили и дека би била прилично изненадена доколку некој светски лидер не забележи што покажува тоа во однос на духот и силата на НАТО алијансата. Тука мислам и на рускиот претседател Владимир Путин“, додаде американската амбасадорка.
Шведска, која се надева дека ќе се приклучи на алијансата, и Јапонија, исто така, учествуваат во вежбите предводени од Германија.
На вежбата „Ер Дефендер 23“ (Air Defender 23) ќе има 10 000 учесници и 250 авиони од 25 земји.
Вежбите се дизајнирани да симулираат одговор на напад врз земја-членка на НАТО. Иако маневрите се одвиваат додека беснее војна меѓу Русија и потенцијалниот кандидат за НАТО Украина, официјални лица од германските воздухопловни сили рекоа дека идејата за вежбата датира од 2018 година, пред почетокот на целосната инвазија на Русија на Украина во 2022 година.