Премиерот на државата и претседател на СДСМ Димитар Ковачевски за утре свикал седница на Централниот и Извршниот одбор на партијата. Претседателот на ВМРО-ДПМНЕ Христијан Мицкоски го повтори ставот дека ја прифаќаат понудата да учествуваат во идната влада до избори, но под одредени услови.
Како што соопшти портпаролката на СДСМ на денешна прес-кнференција, по вчерашната лидерска средба меѓу Ковачевски и претседателот на ВМРО-ДПМНЕ Христијан Мицкоски се создале нови околности на политичката сцена и тоа било повод за свикување на Извршниот и на Централниот одбор на СДСМ.
„Секако дека тема ќе бидат начинот и формата со која што понатаму ќе продолжат преговорите со ВМРО-ДПМНЕ“, изјави Кузеска.
Ианку, на вчерашната лидерска средба меѓу Ковачевски и Мицкоски, СДСМ предложи широка коалиција со сите партии кои се за евроинтеграција, но пратениците на ВМРО-ДПМНЕ да гласаат за уставните измени. Опозициската ВМРО-ДПМНЕ го прифати предлого со услов - влада на широка коалиција, но без ДУИ да учествува во неа. ДУИ го прифати ваквиот предлог, но само до одржување на избори. Разликите меѓу партиите беа во деталите, кога и како да се гласа во Собранието за уставните измени и од кога да стапат во сила.
Видете и ова: Широка влада за уставни измени без ДУИ?Кузеска денеска повтори дека Мицкоски и ВМРО-ДПМНЕ го промениле ставот од вчерашната лидерска средба, велејќи дкеа ВМРО-ДПМНЕ „прифатија уставни измени и учество во Влада за европска иднина на паритетна основа, со ист број на министри“.
„Дури и условот ДУИ да не биде дел експресно беше прифатен од страна на ДУИ, само да не се измислуваат нови и нови услови. Од друга страна прифатено е барањето измените на Уставот да важат одложено, односно од денот на одржувањето на втората меѓувладина конференција. Барањето за избори што понатаму ќе ги спроведе заедничката влада исто така е прифатено“, рече Кузеска.
Мицкоски денеска повтори дека одговорил на тоа дека ја прифаќаат понудата ВМРО-ДПМНЕ да учествува во идната влада до избори, но под одредени услови.
„Прв услов е конечно Македонија да ја ослободиме од ДУИ. Таа нема потреба да биде во таа условно кажано преодна влада. Го поздравувам потегот на Бујар Османи што тоа го прифати во името на ДУИ. Кога станува збор за уставните амандмани, еве да речеме да го прифатиме гласањето за тие, но да биде одложен ефектот, односно со одложено дејство. Практично околностите нема да се променат, нема да имаме промена на Устав, тие амандмани нема да бидат дел од тој устав, се до моментот додека Македонија не стане земја членка на ЕУ“, рече Мицкоски.
Видете и ова: Партиски покер за уставни измениМицкоски исто така рече дека во овој момент Владата го нема потребното мнозинство во Парламентот за уставните измени што ги прифатила пред една година без да биде консултирана опозицијата, односно ВМРО-ДПМНЕ.
„Кога се нудеше ВМРО-ДПМНЕ тие го одбија, кога предупредуваше тие го игнорираа и потоа кога нудевме континуирано решение тие решенија ги игнорираа“, рече тој.
Мицкоски денеска додаде дека ВМРО-ДПМНЕ нема да прифати промена на Уставот под бугарски диктат.
Вметнувањето на Бугарите во македонскиот Устав е услов за продолжување на преговорите на земјава за членство во Европската Унија. Уставот може да се измени со двотретинско мнозинство во 120-члениот парламент во Скопје, но засега мнозинството ги нема потребните гласови.