КФОР соопшти дека во судирите во Звечан повредени се околу 25 војници

Околу 25 војници од мултинационалниот контингент беа повредени за време на задушувањето на демонстрантите кои протестираа во општина Звечан, на северот на Косово, објави КФОР во понеделникот вечерта на 29 мај.

Единиците на КФОР беа распоредени во четири општини на северот на Косово со цел да ги запрат насилните демонстрации што се случија откако новоизбраните градоначалници се обидоа да ја преземат функцијата во последните неколку дена во четирите општини на северот, каде што живее мнозинско српско население.

„Неколку војници на италијанскиот и унгарскиот контингент на КФОР беа предмет на неиспровоцирани напади и се здобија со рани со скршеници и изгореници поради експлозија на запаливи средства“, соопшти КФОР.

Интервенција на КФОР во Звечан, има повредени

Моментално повредените војници се под надзор на медицински персонал.

Командантот на мисијата на КФОР, генерал-мајор Анџело Микеле Ристучиа, рече дека неиспровоцираните напади врз единиците на НАТО се неприфатливи и дека КФОР ќе продолжи непристрасно да го исполнува својот мандат.

Од утрото на 29 мај, групи Срби протестираат во Звечан, Зубин Поток и Лепосавиќ поради насилното влегување на новите градоначалници на општините на север во општинските згради во петокот на 26 мај.

Повторно се зголеми тензијата во општините на северот на Косово откако беа избрани градоначалници кои излегоа на вонредни избори на 23 април - сите Албанци.

Видете и ова: КФОР ги повика страните да не ги зголемуваат тензиите на северот на Косово

Досегашните лидери на четирите општини на северот, Северна Митровица, Зубин Поток, Звечан и Лепосавиќ, каде живее мнозинско српско население, беа од Српската листа.

Но, во ноември минатата година тие поднесоа оставки во знак на незадоволство од одлуката на Владата на Косово да ги пререгистрира автомобилите со РКС - регистарски таблички на Република Косово.

Изборите на 23 април ги бојкотираше Српската листа и мнозинското српско население на северот, кое сега не ги прифаќа резултатите, односно новите претседатели.

Меѓународната заедница ја осуди одлуката на Владата на Косово да ги принуди градоначалниците да влезат во општинските згради и ги повика властите на воздржаност и повлекување.